Tidukla “Tafat” n taddart n At Ɛisi di tɣiwant n Leɛǧiba s lemɛawna n srabes n tɣiwant n Lesnam, texdem yiwet n lḥemla n usizdeg n twennaḍt i ubrid yettawin ɣer Tikjda. Tasebḥit n wass n lexmis yezrin, kkren yineɣmasen n tdukla-agi, ur cligen deg yiṭij qessiḥen, bdan ajmaɛ n tqerɛatin d lewsex yuzzaren ɣef yiri n ubrid. Ugar n 100 n tcekkarin i ččuren. Ilaq kan ad d-nini belli s tidet “Tafat” tbeddel udem i twennaḍt deg umkan-agi, imi yuɣal zeddig, yezmer umdan ad yesgunef deg-s. Afud igerzen i tiddukla-agi, d ayen ara yilin ahat d tamsirt iwakken ad ḥadren yimdanen tawennaḍt, yerna ad ḥarben fell-as.
M. Smail