Essaid, Idir, Laid i tlata yid-sen d atmaten. Nemlal-iten di cceṭ n Bakaru. Yella yid-sen lǧar-nsen Samir akked mmi-s εemmi-tsen Rahim. Am nutni am waṭas n warrac n temnaḍin i d-yezgan rrif lebḥer. Yal mi ara d-yaweḍ unebdu ttfarasen tagnit n wussan umaris, xeddmen di lecḍuḍ akken ad εiwnen imawlan-nsen deg umesruf n uɣerbaz.
Yuɣ lḥal aṭas warrac i nwala s wallen-nneɣ deg umkan : wa yeznuzay lkawkaw, wa d lakrim wa… Arrac-a d wi nemlal nutni ssekrayen iparasulen i yiḥewwasen. Essaid ameqqran deg-sen d anelmad di tesnawit, yebda lxedma-ya seg 2001 imir yesεa 9 yiseggasen di leεmer-is. « Mkul aseggas nxeddem da nekk akked wayetma. Nessekcam-d armi d 8 yimelyan d tadrimt ». Gma-s Laid yeqqaren deg CEM daɣen d amyurar deg terbaεt yimeẓyanen n JSMB yerna yessefhem-aɣ-d : « Γur-neɣ 15 yiparasulen nessekray-iten s wazal n 150 DA i yiwen. Nesεa daɣen snat n tqiḍunin i nessekray s 300 DA i yiwet ».
Idir, ula d netta d anelmad di tesnawit. Yesḥassef imi aseggas-a ulac aṭas n yiḥewwasen am yiseggasen iεeddan d ayen i yeǧǧan ad tenqes lxedma : « Llan wussan ideg ur nessawaḍ ara ad nessekru ula azgen seg yiparasulen-nneɣ ». Samir yerra ssebba n unqas n yiḥewwasen ɣer lixsas n laman : « Zik ilkel d lfamilyat i d-yettasen ɣer dayi. Ma d tura llan yimakaren d yisekraniyen i d-ixeddmen lmacakil ».
Arrac-a sḥasfen ula ɣef lqella n tezdeg i d-yettilin s ssebba n kra n yiḥewwasen « Wi yeṭṭeyyiren zbel-nsen ɣef rmel ». Taswiεin d nutni i yessizdigen amkan ladɣa anida i ixeddmen.
Γas ma ur nhewwen ara tiɣimit akked warrac-a umεinen. Neǧǧa-ten s lferḥ u nutni weεden-aɣ akken ad awin igemmaḍ yelhan di leqraya-nsen. Ladɣa imi lawan n uɣerbaz ad ten-yaɣ lḥal ččuren-d leǧyub-nsen d tadrimt.
Mokrane Chikhi