Mačči d yiwet gar temseḍsa tagi maca teḍra d ssaḥ ussan-agi i iεeddan ! Anda ? Di tudrin n Ssaḥel, i d-yezgan di Buzeggan, rnu mačči akked yiwen kan !
Tagi d yiwet n terbaεt : snat n tlawin d sin n yirgazen, i yeɣran di lḥirfa n tukerḍa (ma nezmer ad d-nini akka !). Γef wakken i d-ḥkan wid iwumi teḍra, agraw-a yettruḥu deg ufurgu ɣer tudrin ur ten-yessin ara, sqerbiben s ixxamen, qqaren : “nekkni d inexḍaben, nusa-d ɣer yelli-twen…” imir ad d-yali ula d ayen ur nelli : mmi-tsen d “imigri”, yeɣra, yefhem, yettnadi ɣef yelli-s n leḥlal, cekkren-ken-id medden… D ayen ibanen, ur telli kra n tidet deg wayen d-qqaren, aya akken kan ad ẓren ma yella urgaz deg uxxam ? Ma ulac-it, ad akren i sen-yehwan… Ma ufan-t deg uxxam, tilawin-nni ad terren ɣer wayen nniḍen : awal ad d-yawi wayeḍ alamma tufiḍ-tt d “tamusnawt” deg temsal n yiḥeckulen d ssḥur… lal n uxxam ur tettuḥtam alamma tefka “tafunast d yelli-s d lweεda”!
Wid yeslan s yisalli-a ḍsan-d ! Ma d wid iwumi teḍra la ttgallan deg terbaεt-agi iwumi d-llin tiwwura n yixxamen-nsen ala rrsas ara ten-yeččen ma yella win ten-id-yemlalen tikelt-nniḍen.
Djamila Ahitaghel