Ilmend n useggas n leqraya 2009-2010, yella-d usewjed n wazal 2250 n yimekwan deg uḥric n uselmed n lḥirfat, deg 11 yiɣerbazen deg lwilaya n Tizi Wezzu. Aseggas-agi amaynut d win ideg ara d-yili uselmed n yiḥricen imaynuten am win n waman d uraqeb n selɛa. 480 n yimekewan n tguni i d-swejden yimḍebbren n uḥric-agi ilmend n yinelmaden ibaɛden ɣef yiɣerbazen, gar-asen 240 yimekwan deg Iɛeẓẓugen, 240 deg Makuda, Tizi Γennif d At Wagnun. Aya bla ma nettu belli yal aɣerbaz yesɛa asečču-ines ala win n At Meḥmud iwumi yetturaju tifrat n wugur-agi deg wussan i d-iteddun. Azal n 8 yisenfaren-nniḍen i d-tsewjed ddulla deg uḥric-agi n uselmed n lḥirfat, gar-asen lebni n 2 yiɣerbazen deg tɣiwanin n Friḥa d Ibudraren. Deg tɣiwant n Ljemɛa n Sarij, ad d-yili usegrireb n uɣerbaz n uselmed n lḥirfat imi tizeɣwa-ines d tid yettuhudden, ad d-yili lebni n uɣerbaz-nniḍen deg umkan-is. Si tama-nniḍen, ad d-yili lebni n 114 n yixxamen i yiselmaden n uḥric-agi deg yiɣerbazen yemgarraden. Ad d-nerr lwelha belli aḥric-agi n uselmed n lḥirfat, d win iɣef d-yettili aṭas n usuter sɣur yinelmaden i d-yeffɣen deg yiɣerbazen n leqraya ladɣa tullas. Imi deg useggas yezrin, deg uḥric-a, azal n 700 ifukken taɣuri-nsen gar-asen 435 tullas.
Dalila I.