Tikelt-a, s tidet beggsen yiɣallen n laman iwakken ad meḥqen aẓar n yimesḥaf yebɣan ad snegren tamurt. Amek ihi, aql-aɣ deg wass wis 2O segmi i kecmen yiɣallen-agi tiẓegwa d yidurar, ttnadin ɣef yirebraben d wanda ttidiren.
Tuffɣa-agi tewwi-d azal-is, imi di tama Tmellaḥt di tɣiwant n Aḥnif, sin n yirebraben ɣlin-d deg ucebbak n lɛesker mi akken i ten-teḥres tmes. Dɣa wigi, ɣef wakken i nesla, ulin s adrar deg useggas n 2007, d acu kan ismawen-nsen ur nessaweḍ ara ad ten-id-nawi. Di tama-nniḍen, lɛesker s lemɛawna n srabes n yimsulta n tɣiwant (garde communale), ur ṭṭaxren ara seg yiberdan, imi ttɛassan tikeryas i yettɛeddin. Am yiḍ am wass, ur ɣfilen, ur brin i ṭṭbel deg waman, acemma ur t-ǧǧin di ccekk. Ama si tama Imceddalen neɣ Semmac, terreḍ alamma d Tikejda, iɣallen n laman ɛussen akken iwata.
D tikelt tamezwarut, ahat, i nwala yiwet n tuffɣa yeṭṭfen annect-a n lweqt, d ayen yeǧǧan imdanen umnen waqila ad d-ters talwit, dɣa d tagnit ideg ara nneqḍaɛen yiɛdawen n tudert i iceɛlen times di tmurt.
M. Smail