Ayen yettağğan, ahat, amur ameqqran n yimezdaɣ ad rfun, ad d-ffɣen imir s abrid, d aweɛɛed n yimḍebbren. Meɛna, uguren rennun ur ferrun, iɣeblan gemmun deg waṭas n tudrin deg twilayt n Bgayet. Deg lawan ideg lantirnet yuɣ azal deg tudert n umdan, mazal aṭas n tuddar yettexnunusen deg yiɣeblan n waman, n yiberdan, n yisenfaren n VRD, atg. D acu, mačči d uguren i idemmiren imezdaɣ n tudrin ad ɣelqen iberdan neɣ ad ceɛlen rruḍa deg tlemmast n ubrid aɣelnaw, imi ddren yes-sen, uɣen tanumi yes-sen ; meɛna d aṛeggem n yimḍebbren i d-yessenkraen ccwal, d tuzzya s wawal i d-yessalayen ddemmar d wurfan. Tadyant – imi nezmer ad as-nsemmi akka – n tɣiwant n Tewrit n Yiɣil, temmal i tikelt t-100, tidet qerriḥen ideg ttexbibiḍen yimesdurar « n twaɣit » akken i s-yenna umedyaz. Tudrin tuffirin, ur d-nezgi deg yiberdan iɣelnawen, ur wwint ur rrint i yimḍebbren ɣas ma deg yisenfaren n PCD (Plan communal de développement), sɛant azal-nsent. Dɣa, aṭas seg-neɣ i yessnen tudrin asmi kan ara d-ffɣen yimezdaɣ-nsen ɣer ubrid. Deg Dargina, anwa yessnen taddart Tadargunt amer ur yuzzil ara wawal deg yiɣmisen fell-as. D lmuḥal, 47 n yiseggasen, nutni ttsuɣun i win ara yeslen ur sɛin ara aman. Yefra fell-asen lḥif, lḥemdulah ! Deg taddart Buqadum i yeṭṭafaren taɣiwant n Dargina daymen, imezdaɣ ffɣen-d ɣer ubrid, ɣelqen tazeqqa n tɣiwant, suturen ad d-neggin waman deg tbernin n yixxamen-nsen. Wali kan ! 10 yiseggasen segmi fukken asiweḍ n yiqudas ɣer yixxamen ma d aman ulac. Deg Wedɣir, imezdaɣ n 22 tudrin i iɣelqen tazeqqa n ssrabes n waman ADE, imi deg uzɣal am wa, aman ur ttilin. Ssebba, d azal n 120 lmitrat n yiqudas i ixussen akken ad awḍen s aman s anda neggin. Kifkif daɣen, deg taddart Tamukra, ɣef tɣiwant iɣer ẓeddmen. Akka, deg wadeg ad frun yiɣeblan, rennun-d, ttmiren deg unebdu ɣer wayeḍ,; ma d imḍebbren la weɛɛden ad ten-frun, ar melmi ? Ahat, d tanumi ay numen yimḍebbren, ur d-xeddmen kra almi d-ssawlen s ujajiḥ n tmes yimezdaɣ yenṭerren.
D. I.