Ur tewwiḍ ara ddurt segmi kfant tfaskiwin d tmeɣriwin deg tɣiwant n Bgayet d tid i as-d-yezzin, ad bdunt tiyaḍ ; tid n remṭan. Aseggas-a, ayen i d-yernan d amaynut ɣef wuḍan n remṭan n yiseggasen yezrin, imi nuɣ tanumi d ssehrat n ccna kan ay d-yettili, d amezgun akked timiliyin d yimyura ara d-yawin awal ɣef yidlisen-nsen. D ayen ara yeğğen ibgaytiyen ad fernen anda isehher imi lxetyar yella.
Deg uxxam n umezgun n Bgayet Malek Bugermuḥ,; ad ilint aṭas n trebbaɛ n umezgun n twilayin yemgarraden ara d-yerzun. Iḍ amezwaru, taceqquft n terbaɛt n lezzayer ara d-yuraren « Lḥağ yeɣleb Leɛwej », ad tt-id-ḍefren imir : « Tartuffe » n Qsenṭina, « En naḥs wa El Qubṭan » n Batna, « Mezɣenna 95 » n ɛennaba, « Es-saddma » n Wehran. Bla ma nettu, taceqquft « Urgaɣ muteɣ » n Muḥya i d-yessufeɣ axxam n umezgun n Bgayet, ara yerzun ɣer tɣiwanin n Amizur, Berbaca, Semɛun, Aqbu, Berj Mira, ɣer Bgayet ass n 24 deg ɣuct.
Timeɣriwin n ccna, ad ṭṭfent adeg-nsent daɣen deg uxxam n umezgun, imi seg 11 almi d 18 deg ɣuct, d tid ara yefken tagnit i warraw n temdint n Yemma Guraya, ad ttun kra seg yiɣeblan-nsen yal iḍ,; s yicennayen yettwasnen deg temnaḍt-a. Ula d sinima ad yili, tidukla « Project’heurts » tefren iḍ n 3 deg ctember d iḍ n court-métrage.
Wid iḥemmlen taɣuri d tira, ad ilin ɛlaḥsab Mass Kader Sadji, yiwen seg yimḍebbren n Café-littéraire, snat n temliliyin d yimyura. Tamezwarut, ass n 28 deg ɣuct ɣef 9 d uzgen n yiḍ,; awal ad yili d umyaru Rachid Oulebsir ɣef udlis-is « les derniers Kabyles ». Ma d tis snat, ad tili deg yiḍ n 4 deg ctember d tmedyazt n Habiba Djahnine. Timliliyin ad ilint deg tzeqqa tameẓẓyant n uxxam n umezgun Malek Bugermuḥ.
Ahat, ayen ara d-yernun azal i uḍan n remṭan n useggas, d tirza n yiseḥḥaren d les clowns ɣer sbiṭarat n Xellil ɛemran n Bgayet akked d win Amizur.
Dj. Ikhloufi