Ssmid i iɛefnen i twaculin yenhafen

Ussan n remḍan ttɛeddayen ttemcabin deg Bgayet. Tiwuɣa daɣen ! Taneggarut i nesla, akken i d-nnan, d ssmid iɛefnen yettwafreq i twaculin yenḥafen deg tquftin-nni n remḍan. Remḍan, ur as-mazal ara, meɛna ɣas ad ifakk akken ad fakkent twuɣa-s d tid n yemdanen : awi-d rrbeḥ ṭixer i nniya d laman ; ad nẓum, ad nẓall, ad nḥellel tukerḍa !

D iqenṭaren n ssmid i iɛefnen, ferqen-ten srabes n DAS n twilayt n Bgayet i tɣiwanin. Akken imir, tiɣiwanin-a ad t-ferqen i twaculin yenxessen. Meɛna, aṭas n yiselwayen n tɣiwanin yekksen ssmid seg tquftin n remḍan imi yettwaɣ.

Lwali n Bgayet, Mass Ali Bedrici, iwelleh anemhal n la DAS akken ad d-yaf tifrat i twaɣita, ad iwali amek ara tt-yefru. Dɣa, neɛreḍ ad nmeslay d unemhal n la DAS akken ad aɣ-d-yessefhem tadyant, ad aɣ-d-yefk amek i as-d-yufa tifrat, meɛna ulac !

Deg tmura i yettqadaren ula d igellilen-is, tadyant am ta ur tferru s ubeddel n tcekkarin n ssmid. Din, deg tmura i iḥemmlen tidet, tid i izerɛen nniya d ssfa, ccreɛ ad yili yebda tasestant-is, ad yili yeldi yakan usafsar akken ad walin amek almi i d-teḍra tedyant am ta deg wayyur n “reḥma wa lɣufran”.

Dj. Ikhloufi