Ifukk unebdu, d tallit n tuɣalin ɣer tɣuri. Inelmaden ; wa d atrar wa yuɣ tanumi, iḍelli 13 deg ctember uɣen-d abrid n lakul, meɛna yal wa d acu i d-yewwi deg uqerruy-is.Aseggas-a, deg twilayt n Bgayet, yewweḍ leḥsab ɣer 206 185 yinelmaden i d-yeṭṭfen abrid, iḍelli ɣef 9 n ssbeḥ,; qbala s iɣerbazen-nsen. Ad naf deg uswir amenzu, 558 n yiɣerbazen n twilayt n Bgayet ara yeldin tiwwura-nsen i 85 475 n yinelmaden, gar-asen 13 943 i tikelt tamezwarut ara yemmager uqadum-nsen d uselmad. Deg uswir wis sin, amḍan n yiɣerbazen yewweḍ,; aseggas-a, ɣer 146 ara iqablen 83 159 n yinelmaden gar-asen 28 441 i d-yeffɣen seg uɣerbaz amenzu. Ma deg uselmed deg tesnawiyin ideg yewweḍ umḍan-nsent, aseggas-s deg twilayt n Bgayet, ɣer 49, ldin tiwwura-nsent i wazal n 37 551 n yinelmaden gar-asen 14 829 d ijdiden ara yilin deg useggas amezwaru n tesnawit.
Aseggas-a, ayen yellan yeṭṭef lwelha deg wayen yerzan aselmed, d Mass Ali Bedrici, Lwali n Bgayet, i yesḥersen ɣef yinemhalen n srabes n twilayt akked d yiselwayen n dairat, akken ad heyyin akken ilaq unekcum ɣer uɣerbaz, dɣa aṭas n temliliyin i iga yid-sen. S wudem unsib, ldint- iḍelli 76 tneɣriyin tijdidin i yiɣerbazen imenza deg Ssuq-Letnin, Wadɣir, At Smaɛel, atg. Deg uswir wis sin, ldin 6 yiɣerbazen deg tɣiwanin n Aqbu, Bni-Ksila, Iɣil-Aɛli, Buḥemza, Mellala akked Cellaṭa. Rnu ɣef waya, 21 n lkantinat ara yeldin ussan-a kan i d-iteddun deg yiɣerbazen yemxallafen n twilayt. D wayen yerzan addal, ad bdun lecɣal n yinurar akked tzeɣwin n waddal deg tesnawiyin i yellan deg tɣiwanin n Bgayet, Ticci, Dreɛ-Lgayed, Aqbu, Tazmalt, Melbu, Xerraṭa, Ssuq-letnin.
Dj. I.