Axxam n yilmeẓyen Yusef Uqasi di tɣiwant n timizart “yugi yiṭij ad d-yecreq fell-as”. Seg useggas 1985, aseggas deg waydeg yekfa lebni-ines ar ass-a yeqqim akken mebla anemhal ara t-iseddun akken ilaq, ara t-yesselḥun i lfayda n yidles d yilmeẓyen. Axxam yeqqim d ilem. D tidet d ayla n tɣiwant maca inḍebbren neɣ lemyur akk iɛeddan ugin, gumman ad tt-gezmen di rray wa ad rren axxam-agi ddaw leɛnaya n tnemhalt n yidles neɣ n yilmeẓyen n lwilaya n Tizi-Wezzu. 25 yiseggasen ayagi lemmer mačči d lebɣi n kra tdukliwin tidelsanin i isedduyen leqdic-nsent dinna tili ahat axxam-agi ad yuɣal d apulayi ! Ma d axxam n yilmeẓyen n taddart n Yibdac i d-yezgan di tɣiwant n Tmizar yessewḥac wudem-is, ula i d-nini fell-as. Akka i teḍra d yilmeẓyen n tɣiwant n Tmizar. Ttwabedren-d kan di ddiɛayet n lbuṭ !
Ɛebdella Ɛerqub