Ta d taqsiṭ yeḍran d Dda Ḥsen, ass n temlilit n ddabex-uḍar gar Lezzayer d la Zambie. Dda Ḥsen, tikwal, yettɛemmid mi d-yuder kra yiwen ayen ur s-neɛjib, ad yesɛuẓẓeg iman-is ; meɛna s tidet ay ixus acemma deg tmesliwt. Yezdeɣ deg yiwet n lbaṭima i d-yezgan deg tlemmast n temdint Bgayet. Dɣa, kra ara yeḍrun deg temdint ama yelha ama diri-t, lɣaci ɣer lḥuma-ines ay d-ttruḥun ad suɣen ; lḥuma n Dda Ḥsen d timiṭ n Bgayet. Ihi, luǧuh n 12 yiḍ,; yesla i kra n zzhir, iḥus amzun tezlez lbaṭima. Di tazwara, yenna ahat d aqerruy-is kan i as-tt-ixedmen ; mi tqefleḍ imeẓẓuɣen-ik, ad tesleḍ i zzhir daxel uqerruy am wakken d labyu (avion). Zzhir iḍul. Yuɣal yenna imi, ass-a, netta yeɛya ma d aqerru-s ur yeɛyi, yebda-tent-id kan. Mazal Dda Ḥsen yessal i leɛyaḍ,; zzhir irennu ur yettenqas. Dayen, d ayen ur iqebbel leɛqel. Ssut yessaɣ akk lḥuma. S yiɣil n yiɣallen i d-yerfed iman-is seg wusu, acemma acemma yelḥeq ɣer tewwurt, ssut kulεemmal yettzad. Yeldi tawwurt iwala Islam, mmi-s n lǧar-is i izedɣen nnig-s, yettazzal gar yifassen-is senǧaq n Lezzayer. Atan, yeḍfer-it-id baba-s yettɛeyyiḍ. Yenna ahat d kra i yexdem uqcic-a i baba-s, ad t-yemneɛ Rebbi ! Meɛna, mačči anagar Yusef d mmi-s, Islam, i yettazzalen deg lbaṭima. Lǧiran merra ! Mi yudren lǧiran ineggura, isakked ɣer tewwurt n tjaret-is, Nna Ṭawes. « Ma yella wi yellan, ilaq ad nxebber Ṭawes ! Yeḥseb-iyi Rebbi amzun d zlezla », i yenna Dda Ḥsen.
Dda Ḥsen, yewwi-d lexber lǧiran ur tettaǧǧan ur t-tettun, meɛna anda teẓriḍ ma d zlezla ccɣel yuεer ! Llan kra n lecɣal ur ten-tettidireḍ ara berdayen. Lxuf yessufuɣ leɛqel. Yuzzel yesqerbeb ɣer tewwurt n Nna Ṭawes. Atta teldi-d tewwurt, atta teffeɣ-d Nna Ṭawes, aqerruy-is icudd s tfunart. D yiwen seg dderya n yelli-s i d-yusan ɣur-s, mi d-yella kra deg unnar, ad yebdu tiyiti s rrkel zelmeḍ-yeffus. Ata amek i tt-yemken, ifeddex-itt.
– Acu a Ḥsen ? I as-tenna.
– Ur tesliḍ ara i yeḍran, i zzhir yekkren ?
– Sliɣ.
– Acu yellan ?
Teẓẓuɣer-it, tewwi-t s abalkun, tesken-as-d lɣaci deg berra.
– D Lezzayer i iɣelben la Zombi.
Yuɣal ɣer uxxam, yenna « Ziɣen uɛren les Zombis mi ara d-uraren ddabex ?
Ait Ighil Mohand