Imḍebbren n uxxam n yilmeẓyen n tezmalt, aseggas-a, heggan-d yiwen n leqdic d amerkanti i lfayda n yilmeẓyen n lεerc At Mlikec s umata. Di tazwara, deg ussan-a ad yebdu uselmad n wid leεmer kecmen lakul ; tuget d tilawin I iḥejben deg uxxam. Aya, ad yili s lemεawna n ddiwan aɣelnaw n uselmed i wid werǧin ɣrin di tudert-nsen. Am wakken daɣen ara bdunt temsirin n tegnizit d tefransist i wid yebɣan ad snernin aswir-nsen. Γer waya, leqjur n temkerḍit n uxxam-a yuɣal d amerkanti s yidlisen ijdiden di lesnaf yemxalafen ladɣa tasekla d wid yerzan ilmeẓyen ara yesεeddin ikayaden n Bac akked BEM. Rnu ɣer waya, ldin yiwet n tzeqqa n lantirnat. Mebla ma nettu isaragen i d-yettuheggan i useggas ɣef yisental yemxalafen. “Iswi-nneɣ d tilin s lmendad i yilmeẓyen- nneɣ d uwelleh-nsen ɣer wayen ara ten-inefεen”, i d-yenna Mass Aεrab Muḥend Lεerbi, Anemhal n uxxam n yilmeẓyen n Tezmalt.
Ma deg wayen yeɛna addal, terbaɛt n tennis de table n uxxam n yelmeẓyen tezmalt d netta i yettmetilen lwilaya n Bgayet di temsizlin tiɣelnawin.
B. Benhamouche