Urɛad flen 10 wayyuren seg wasmi i yuɣal Barack Obama d aselway ɣef tmurt n Marikan ; yeccelqef-d yakan arraz n Nobel. Bab n “Yes, we can” iweɛɛed, aṭaṣ tlufa, ara yefru, tilufa-nni akk icudden deg lawan-nni n George W. Bush. Meɛna tasiwɛt tuḥwaj taswiɛt-is, iɣeblan yecban wid i d-yeǧǧa uselway aqdim ur ferrun s ssafaga ; ula d arraz n Nobel s teswiɛt-is ! Neɣ d abernus n liser akked tlaba n sser sɣur tesqamut n warraz ?
Yezmer, imi d aselway n Marikan iɣef tberren ddunit akken yeqqar winna, arraz n talwit n useggas 2009 i uselway Barack Obama d asafu ara yessiɣen asirem deg wulawen n talsa akk. D arraz i d-yeqqaren i bu sin n yiḍarren : berkat-aɣ amennuɣ d ṭṭrad, uɣalet-d ɣer ṭṭabla n lemcawra, dayen kan ay d abrid, acku wallan ṭṭrad yettawi-d ṭṭrad, ihi tura ad neɛreḍ lehna, ahat ad d-tawi lehna, dayen i nessaram !
Ahat, daɣen, d sellak i uḥeṣṣal ? Imi, ussan-a ineggura, tettenɣas cciɛa n Barack Obama ɣer yimezdaɣ n Marikan, bdan ttaysen, lweqt ttwalin-t ifel i tɣaltin, abeddel yennejla seg tqaɛtin. Rnu, yettunnefk-as-d warraz swaswa deg lawan-nni anda la tettraju imsertiyen akk n tmurt n Marikan ɣef rray ara yeddem : rray n uceyyeɛ neɣ ala n yiɛeskriwen ijdiden ɣer Afghanistan.
Lḥasun, awal ay t-ifetlen d At Usqamu n warraz, ur yettuɣal ur yettruẓ wawal-nsen : arraz n Nobel n talwit n useggas 2009 d Barack Obama ay t-yewwin. D ccɣel ara d-yawin awal !
Dj. Ikhloufi