Azal n 46 yiɣerbazen imenza i d-yezgan deg tuddar yettwaɛezlen deg twilayt n Bgayet, teɣleq-iten tenmehla n usegmi aseggas-a imi drus wid ara yeɣren deg-sen. Iɣerbazen, tebna-ten lḥukuma-nneɣ s tedrimt n ddula deg yiseggasen iɛeddan.
Taluft-a d tin i yesqerdec usqamu aɣerfan n twilayt APW n Bgayet deg temlilit-is taneggarut i iga. Yessuter usqamu ad uɣalen yiqerbazen-a i tɣiwanin akken ad gen deg-sen kra ara iṣelḥen i yimezdaɣ n tuddar-nni, tugart leqdic adelsan i yilmeẓyen am yiɣerbazen n uselmed n lḥirfat. D ayen sway sutren yakan iselwayen n tɣiwanin seg yilindi. Dɣa lwali, Mass Ali Bedrici, yesbedd-d tasqamut ideg kkin lemyur n tɣiwanin-a, ufrinen n APW, iɛeggalen sɣur tenmehla n usegmi. D tasqamut ara yeddmen rray aneggaru, d nettat ara d-yinin yal tazeqqa n uɣerbaz d acu ara tt-rren.
D. I.