Γef wakken i d-yenna yiwen gar yimḍebbren n sbiṭar n Tizi-Wezzu, ugar n 2900 yimdanen i kercen yiqjan neɣ yimcac di tazwara n useggas-a ar tura di temnaḍin akk n lwilaya. Iqjan-a akked yimcac-a d wid ur nesεi ara imawlan ; ttmenḍaren kan deg yiberdan. Imḍebbren n tezmert n Tizi-Wezzu qublen akken iwata taswiεt imi i d-swejden ddwa (vaccin antirabique) ilaqen i ucraḍ n yimdanen yettwakercen.
I usmekti ddwa-a azal-is 5000 yidinaren, tettnuz di berra, acu kan imdanen zemren ad d-cerḍen baṭel di sbiṭarat. Akken i d-yenna Ğamal afremli : « Acraḍ-a llant deg-s 11 tsegnay ara d-yekkat umdan yal ass ɣef teɣzi n ddurt imir syin ad mbaεadent tid d-yeqqimen. Yal tisegnit iwata ad tili deg wass-is, ma ulac ad d-tεiwḍeḍ i leḥsab s wadda. » Xas tella-d tmenɣiwt n waṭas yiɣersiwen-a sɣur wid teεna temsat maca mazal llan kra yiqjan d yimcac ttmenḍaren ar tura. « Xas ulamma d axbac kan i ak-yexbec umcic neɣ uqjun, amdan ilaq ad iruḥ ad d-yexdem acraḍ-a », i d-yenna yiwen n umejjay n lmal.
Djamila Ahitaghel