Aɣlaq n yiberdan deg yiseggasen-agi ineggura yuɣal d tanumi di lwilaya n Tizi-Wezzu ; d ttawil iseqdacen yimezdaɣ iwakken ad sutren yes-s tiɣawsiwin imi ɣef wakken i d-qqaren yimdanen-a alamma wwḍen ɣer waya i asen-d-semḥasen. Acu kan si tama-nniḍen, εlaḥsab n wayen i d-yenna lwali, di temlilit-is akk tesqamut n At Wagnun, llan wid i yellan deffir lecɣal-a tikwal.
Ddurt yezrin, d abrid aɣelnaw iɣelqen di tama n Lwad-Ɛisi, imezdaɣ-a iwumi yerɣa llangar anda gganen, ssuturen ad asen-d-fken ixxamen bihbih.
Ma daxel n temdint n Tizi-Wezzu, d abrid ameqqran i iḥebsen (la grande rue), anda ceεlen times i ṛwadi d wafrasen i yufan zdat-sen. Wigi ssuturen ad asen-d-ɣermen lexsara-nni swayes i d-tegla lbumba yeṭṭreḍqen ilindi ; akka i asen-weεden yimḍebbren i d-yenna yiwen i teεna temsalt.
Ma uqbel aya, d tamdint tajdidt n Tizi-Wezzu i yellan d annar n tnekkra imi ula d imezdaɣ-agi kkren-d sbeggnen-d lɣiḍ-nsen s uneɣluq n ubrid.
Ilaq ad neḥsu kan aɣlaq n yiberdan igellu-d s lexṣara i wiyaḍ-nniḍen ur teεni ara temsalt ; wagi d yiwen n umedya : ass n larebεa, d la soutenance n yiwet. Imawlan-is i d-yusan seg Yilula-n-Umalu iwakken ad ḥedren i lɣella n yelli-tsen i ttrağun acḥal d aseggas (5 yiseggasen) ur d-ssawḍen ara armi kfan lecɣal imi d-ufan abrid yettwaɣlaq di tama n Lwad-Ɛisi u terra-ten tmara ad d-dewren si Tala-Ɛetman. Xas Fuziya, imi d nettat i d-yeffɣen tura d tajenwurt, tsedda la soutenance mebla ma llan yimawlan-is, xas tḥus s waṭas i waya, acu kan, s tebɣest-is, tessuli aswir d asawen i d-yeglan s teneqqiṭ igerrzen nezzeh. Mebruk i Fuziya d yimawlan-is, leεquba ɣer lmajisṭir-nni.
Lhocine Ourezki