Deg wussan-agi yineggura yeṭṭuqqet wawal ɣef tɣiwant n At Ɛisa Mimun i d-yezgan di tama usamar n temdint n Tizi-Wezzu ; yettwassnen s waṭas s yisem « At Wagennun ». Taɣiwant yellan, di tazwara, deg yifassen n sin n yikabaren yedduklen (FFS/FLN) tuɣal di taggara-a gar wufrinen n FFS d wid n RCD. Acu kan, taselwit teqqim dima n ukabar n FFS, d amdan kan i ibeddlen. Deg unejmaε aneggaru anda i d-yella usqerdec n wahil n tenfalit n tɣiwant-a, tedda-d tiɣin n snat n tkeryas i yemḍebbren n tɣiwant. Dɣa d taneqqiṭ ɣef wayen i d-yella umgarad s waṭas gar wufrinen, ladɣa wid n FLN i d-yessufɣen yiwen n wulɣu anda i d-wwten s leqqseḥ di lecɣal-a. « Taɣiwant txus si yal tama, nutni ad d-aɣen ṭunubilat swayes ara leḥḥun ; ad ruḥen ad xeddmen iberdan neɣ lakulat s yidrimen-nni. Taɣiwant tectaq duru, nutni la as-ttkemmilen. Cwi kan yeḥbes-iten lwali. Ur tent-d-ttaɣen ara akka tura alamma tεawed tmuɣli », i d-yenna Mesṭafa, yiwen n wufrin. Ula d imḍebbren n kra tesquma n tuddar ugin rray-a ɣef wakken i aɣ-d-yenna uselway n tesqamut n taddart n Umlil.
Lhocine Ourezki