Tizi-wezzu, tasaεet ad tili d 5 n ssbeḥ. Tafat urεad tafrari. Tawwurt n lbaṭima mzal teɣleq. Yiwen n yicer n lakɣeḍ yettwaεleq s lesqa. Imdanen ttawḍen-d wa deffir wa. Yal mi ara d yessiwweḍ yiwen ad yaru isem-is ɣef yicer-nni n lkaɣeḍ akken ad d-iḥerri nubba i usεeddi ɣer ṭṭbib.
Γef 6 n ssbeḥ ugar n 30 yimuḍan i isersen iman-nsen. Amejjay ur d yettaweḍ alamma d 9. Araju ad yernu azal n 2 tsaεtin, ma d imuḍan simmal ttawḍen-d. Mi tewweḍ tsaεet qrib d 8, nufa azal n 70 yiswamen i yuran ismawen-nsen, lɣaci mazal la d-irennu, yernu i merra ilaq ad εeddin. Aya yakk mebɣir wid ad d-yernun akkin d afella.
Amejjay d spécialiste. Tura tuɣal akka d lεadda, yugar ayen ara tafeḍ n yimuḍan ɣer spécialiste walla ɣer généraliste. Meεna ayen yegguma ad t-yefhem leεqel : amek yezmer umejjay-agi ad yesεeddi ayen akk d imuḍan, yerna ad d-yaf d acu n lehlak i ten-yuɣen ? D leεjeb !
Yiwen seg-sen deg Tizi-Wezzu dɣa, deg wakken iεum fell-as lɣaci, yuɣal yufa-d ccufa : yesεedday s 3 ɣer 4 yimuḍan ɣef yiwet n tikelt. Ruḥ kečč qbel-itt naɣ eǧǧ-itt !
Imuḍan εemden i waya, acku yal wa ansi i d-yekka, dɣa smenyafen ad εeddin akken wala ma zzin-d deg wass-nniḍen. Lḥif mi ara k-yeṭṭef nnif d lεezza ttarran aḍar.
Deg tmura i irebḥen, amuḍin d awezɣi ad yerr ɣer spécialiste ma yella mačči d amejjay ara as-d-imudden tabrat s wacu ara yesεeddi.
A wi irun a wi yeḍsen kif kif, tikwal lehlak icuba ḥellu, i as-yenna umedyaz deg wawal-is.
Ait Slimane Hamid