Tidukla tadelsant « El Marhaba » akk d uxxam n yidles Taleb Abderahman n temnaḍt n Ain-Benian, heggan-d yiwen n leqdic s wazal-is, s yiwen n wahil d amerkanti i yiwet n tejmilt meqqren. Tajmilt tameqqrant ad tuɣal i unaẓur mass Medjahed Hamid ass n 25 tuber 2009 ɣef 2 n tmeddit, ilmend n 40 yiseggasen ɣef umecwar i d-yewwi deg tẓuri, di tzeqqa n Prestige n Ain-Benian. Mass Medjahed Hamid d anaẓur yuklalen ayen yugaren tajmilt, acku yefka-d aṭas i ccna n teqbaylit, yekki deg lebni n yidles n teqbaylit. Rnu ɣef waya, Medjahed Hamid iεawen aṭas yilmeẓyen akken ad kecmen ɣer unnar n ccna mebla uguren, yessufeɣ-d ilmeẓyen si ṭṭlam ɣer tafat.
Tadwilt-is n yal ddurt n yiseggasen yezrin deg radyu n teqbaylit (amaṭaf w-2), d tala n tẓuri anda yal ilemẓi ifuden ccna yeswa-d deg-s, wayeḍ yugem-d deg-s, yal wa amek i s-yekkes fad. Medjahed Hamid yelqem acḥal d axalaf, ufraren-d tura, uɣalen gar yetran n ccna n teqbaylit. Medjahed Hamid yessekles ddeqs n tezlatin gar-asent : d kemm i ḥemleɣ,; ccah deg-neɣ,; Ṭawes, ay ul. Ayen yexdem ad yeqqim d agerruj i tsuta i d-iteddun.
Islam Bessaci