‘’..,maca lferḥ ad inekmal ma ires yisem n uɣerbaz-agi ɣef muḥemmed uharun ?…’’ Acḥal n yiseggasen n uraju, acḥal n tazzliwin n yiεeggalen n tejmaεt n taddart n Tifrit, almi d ass-nni n 3 di wenber i yeldi uɣerbaz alemmas amaynut yettwabnan deg umkan iwumi qqaren Tiḥerqatin di Tefrit. Aɣerbaz-a yella-d i yinelmaden n taddart d txeljatin i as-yezzin. Ilmend n tegnit-agi, lεeqqal n taddart heggan-d yiwet n tmeɣra. Seččen ɣef tullya n uɣerbaz-agi, sazzlen idammen : zlan azger, xedmen imekli i yinelmaden akked yinebgawen i d-yusan. “Lukan mačči s tdukla n taddart akked lemεawna n uqerruy n dayra n Uqbu, tili aɣerbaz-agi ur ileddi tiwwura-s aseggas-a. Ad t-ncekker aṭas, d netta kan i d-nufa ɣer tama-nneɣ asmi nettazzal ɣef lebni-s. Tura, ad aɣ-d-teqqim kan lkantina i warrac d ugur, maca ad nazel fell-as alma teldi. Ma d wid iɣef nesḥasef s waṭas, d imḍebbren tɣiwant n Uqbu ur aɣ-d-nefki ara afus n talelt, ur xdimen ara ayen i aɣ-reggmen akken di ddiεaya n tefranin n tɣiwanin iεeddan”, i aɣ-d-nnan Buεetba d Ɛejlan Naser s yismawen-nsen d iεeggalen di tesqamut n lεeqqal n taddart n Tefrit. “Ferḥeɣ s waṭas imi tfuk tazzla d ubekker ɣef warrac n taddart-nneɣ ar iɣerbazen n Uqbu iwakken ad ɣren, maca lferḥ ad inekmal ma ires yisem n uɣerbaz-agi ɣef Muḥemmed Uharun”, i d-yenna yiwen n umezdaɣ,; Sufyan Ɛejlan, d aεeggal n umusu n laεrac. Brahim Ben.