Deg yimalas-a yezrin, yerza lwali n Tubiret, Mass Ali Bouguerra, ɣer tɣiwant n Lesnam iwakken ad yeldi s wudem unsib tiwwura n yiwet n tesnawit tamaynut. Aɣerbaz-agi anda bdan lecɣal n lebni-s deg waggur n furar iεeddan, yezmer ad yemmager alamma 800 yinelmaden. Zdat uselway n tɣiwant-agi akked kra n yimḍebbren n usqamu n twilayt, Ali Bouguerra, ɣas akken yettban-d yertaḥ seg wayen yettwaxedmen, yefka iwellihen i yimεelmen iwakken ad swejden melba leεḍil ayen ixussen, ama d aman, trisiti neɣ afrag.
D ayen i yeǧǧan ahat inelmaden akked yimawlan-nsen ad tixfif fell-asen taεkemt, imi acḥal n yiseggasen-aya, arrac d tullas n Lesnam qqaren di Bechloul. D acu kan, kra n yimawlan ur ffiren ara akukru-nsen, ugaden amer lecɣal-a i d-yeggran ad ten-yefk unebdu i lexrif am wakken i teḍra di kra temnaḍin yecban Takerboust d Saharidj.
M. Smail