Aseggas yettawi-d wayeḍ,; ugur yefran yeslal-d wayeḍ. Akka i teḍra d uselmed n tmaziɣt seg wasmi yebda deg useggas n 1995 di lwilaya n Bgayet.
Almi d aseggas-a i yebda yettaɣ aẓar n uselmed-is. Aya s 153 yimekwan imaynuten i d-ibanen s wudem unsib : 107 i uɣerbaz amezwaru, 36 i uɣerbaz alemmas, 10-nniḍen i tesnawit. Aya ur d-yekki ara kan akka. Yella-d s yinejmuɛen i texdem tdukla n yiselmaden n lwilaya n Bgayet “Tidmi” aṭas tikal ilindi ɣer rrif tenmehla akken ad d-terr lbal i wid terza temsalt s lixsas n yiselmaden i uselmed n tamziɣt, akken daɣen ad ẓren belli tamuɣli i sɛan yimḍebbren n tenmehla i uɛummu n uselmed mačči d tin i ilaqen. Ad d-nesmekti s sin n yinejmuεen i d-yellan zdat tenmehla n ttrebga. Mebla ma nettu lemɛawna n lwali n Bgayet, mass Ɛli Bedrisi, i d-ibegnen lebɣi-s ɣer uselmed n tutlayt n tmaziɣt akken iwata deg uɣerbaz azzayri asmi akken yemlal di yebrir yezrin d iɛeggalen tdukla. « Almi d asmi tewweḍ taluft n uselmed n tmazɣit di Bgayet ɣer ufus n lwali i tebda tettban-d tafat ɣef uselmed n tmaziɣt. Wama seg-s akkin tanmehla n usegmi ur d-begnen ara akk lebɣi ɣer useggem deg yiɣerbazen n lwilaya. Mačči d tikelt neɣ snat i nemlal deg yimḍebbren n tenmehla n usegmi n Bgayet, aseggas-nni yezrin, maca kra ur d-yefri. Nessaram imḍebbren imaynuten n tenmehla n usegmi n ad d-beggen kra lebɣi ɣer uɛemmem n uselmed n tutlayt tayemmat di Bgayet akken iwata », i d-yenna Mass Ḥaǧu Lḥafiḍ s yisem-is d aselway n tdukla n yiselmaden n Bgayet “Tidmi”.
Γer waya snat n temliliyin n usileɣ n yiselmaden tmaziɣt i d-thegga tdukla “Tidmi” deg unebdu-nni iεeddan llant-d s lemεawna n lwali n Bgayet.
B. Benhamouche