almend n wass aɣelnaw n tẓuri, axxam n lḥirfat d tẓuri n lwilaya n Tizi-Wezzu inecced-d ugar n 40 yimdanen i iqeddcen deg uḥric-a ɣer temsikent i d-yellan deg uxxam n yidles Lmulud At Mεemmer n temdint n Tizi-Wezzu. Timsikent i yeddan ɣef teɣzi n xemsa wussan ; si 9 ar 13 deg unbir 2009.
Wid yerzan ɣer temsikent-a, ufan lḥirfat tiqdimin akked yinaẓuren-nsent. Gar tẓuri yeṭṭfen amḍiq ameqqran, ad naf lexyaḍa, talext akked lfeṭṭa, amkan-a ṭṭfen-t imi llan s waṭas. Mebla ma nettu tid d wid iqeddcen diɣ di tgella s umata, talext, zzit n uzemmur akked uẓeṭṭa n tqecwalin ; wagi dɣa d yiwen n urgaz i yesseqdacen ugar n rebεa leṣnaf n yimɣan akken ad yeẓḍ taqecwalt. Ma ɣef wayen yeεnan tizizwa, zyada ɣef tamemt-nsent i yellan d asafar i kra lehlakat, nnan-d dakken ula d tuqqsa-nsent telha i rhumatisme ; mlan-aɣ-d adlis yettmeslay-d s taεrabt ɣef wanect-a. Ihi, acennay Allaoua yettɣennin « a tizizwit texdeε-iyi » yezmer ad-iεiwed leḥsab-is : dayen yelhan i as-tebɣa tzizwit mi t-teqqes.
Dj-Ahitaghel