Armi d ass n amhad yezrin, ugar n ṭam n wussan i qqimen yimnezdiyen (abonnés) n uẓeṭṭa 4G n Lezzayer n teywalt deg Ayt Smaɛel, war aẓeṭṭa-a n tsuta tis ukuẓet. Ilaq ad d-nini d akken mačči d yiwen neɣ d sin n yiɣilifen iseg ccektan yimnezdiyen n uẓeṭṭa-a deg tɣiwant-a ayyuren-a ineggura. Tennerna tmukrist asmi i d-senzen ugar n lqidar n yimudimen seg Actel n Xerraṭa i yimsaɣen n Ayt Smaɛel, armi zegren i tlisa n wayen iwumi tezmer teska. Seg lawannni, yuɣal d imezgi udebdeb deg uẓeṭṭa-a, gar rrwaḥ d tuɣalin seg tikkelt ɣer tayeḍ. Tuɣ ala di tegrest i ttilin kra n yiɛewwiqen i yessefqiɛen akelyan, maca tura yeḍḥa-d wugur inuḥ teɣzi n useggas.
«Aṭas-aya segmi neccekta i wid teɛna temsalt ɣef yir liḥala n uẓeṭṭa n 4G ɣur-neɣ, maca ugin ad d-rren i tsutert. Ttkemmilen asnuzu n yimudimen i yikelyanen imaynuten, nutni snernayen kan deg wugur. Armi d tura, at-an tetterḍeq ddeɛwa », i d-yenna yiwen n umsaɣ seg Tizwal. Ahat uguren iqburen ɣas zgan, ur gdilen tuqqna i internet i umezdaɣ n Ayt Smaɛel. Ma d attwiɣ n uẓeṭṭa ussan-a yeslul-d ayendin d anezgum ɣur yimsaɣen ur nesɛi ttawil-nniḍen ala ma ɛeddan ɣer yimahalen n tilifun aziraz, am Mobilis, Ooredoo d Djezzy.
Tugart imi tanzagt n tudert n tkarḍa n uɛemmer, tneqqes seg wass ɣer wayeḍ. «Mačči d ayen yettwaqbalen wayen txeddem tkebbanit-a n Algérie Télécom yis-neɣ. Tɛedda tura ddurt, ḥaca yettban-aɣ-d uzewwaɣ deg umudim, rnu tesɛa tkarḍa akud n tmettant. Ula di tilifun, nessawal ugin ad aɣ-d-rren. Ilaq ad aɣ-frun aɣilif-a s uzrab neɣ ad aɣ-d-ɣermen ussan i aɣ-iruḥen », i aɣ-d-yenna yilemẓi-nniḍen seg Ayt Smaɛel.
M. K.