« Yerbeḥ neɣ yexser d gma-tneɣ… » neɣ « Anwa wigi, d Imaziɣen! » D imeslayen i nuɣ tanumi nsell-asen deg unnar yal mi ara turar terbeɛt n Leqbayel. D imeslayen i yettarran Baris, Larbès, Iboud d yimeddukkal nsen skarayen aɣebbar deg waluḍ iwakken ur ttnuɣnuɣen ara yimferǧen. Di yal timlilit, ttasen-d s ṭṭaqa Yimaziɣen ad fken afud i terbaɛt nsen. S tidet d izmawen n ǧerǧer i yettilin deg unnar, imi ḥsan mačči kan d ddabex i d iswi nsen, maca nnif d yiseɣ iɣef tteḥbibiren. Khalef d Ben Kaci ad fell-as yeɛfu yerḥem, rran tadrimt di rrif, ttnadin lḥerma. Rebban-d irgazen, refden ccan n tmurt n Leqbayel. Khalef ar ass-a, yal mi tella terbaɛt di ddiq, ad d-yejbu ! D acu kan mačči d yiwen n wass, imi tugi ad d-teffeɣ si lmeḥna. atta-n tettali tettader, trebbeḥ txetter, almi ur nefhim kra ! Imferǧen, ttilin ma stufan, acku iwumi ara cnun » Anwi wigi, d… » ? Ẓran belli imyurar i ten-yecqan d tadrimt. Tarbaɛt tuɣal am ‘ le transit », wa yekcem wa yeffeɣ. Zik-nni, ulac win ara d-yasen ɣef 6 n wagguren neɣ aseggas, JSK d aɣerbaz ! Ziwotko, ulamma yusa-d si tmurt taberranit, yeqqim almi d taggara n umecwar-is di lxedma, yesbedd tarbaɛt netta d Khalef, wwin-d igemmaḍ. Tura, islaɣmayen ttasen-d ttruḥun, di tizwar ad aɣ-d-inin fazen, sɛan tirmit(experience) d ayen kan, kra n wagguren mbeɛd ad ɣlin fell-asen alamma ur asen-ǧǧin kra. Lḥasun, ur neẓri anda icudd yixf-is. Asbexluleḍ-a, yessaweḍ almi tarbaɛt taɣelnawt yellan zik tebna ɣef yimyurar n JSK, tedder almi yiwen ur d-yegri deg-s, almi ula d Meftah yettwakkes-as umkan-is.
Tura, ahat d lawan ad ddukklen yiɣallen iwakken ad rren talast i liḥala-agi uqbel ad d-ilal leɛǧeb.
M. Smail