Ass-nni n Letnayen 28 di Dujenber 2009 ar tmeddit n wass i tekfa temlilit tussnan ɣef umaru Kateb Yacine i d-yellan deg uxxam n yidles n Mulud At Mɛemmar di temdint n Tizi Wezzu. Timlilit tsuddes-itt-id tmehla n yidles n Lwilaya s uttekki n tseddawiyin n Tizi Wezzu, Bgayet, Buzerriɛa, Lzzayer, Galma d la télévision Tazzayrit d kra n tiddukkliwin tidelsanin yecban Adrar At Qdiɛa, Aɛeqqa yessawalen…
Deg wahil n wass amezwaru yella-d wawal ɣef tudert n Kateb Yasin d umennuɣ-is ɣer yidis n yigduden yettnaɣen ɣef yizerfan nsen d wayen i d-yeǧǧa d agerruj i yidles n tmurt n Lezzayer d talsas s umata. Aṭas i d-yusan ad as-rren tajmilt, ama d tawacult-is, ama d yimeddukkal-is ama d wid werǧin yessnen kra fell-as…
» Ass-a d taɛacurt, maca usiɣ-d akken ad kkseɣ cyaḍ,; ad kkseɣ fad di tala i d-yeǧǧa urgaz-agi, imi tamussni-ines tefka ass-a ad tlemden yakk wid yettnadin ɣef wayen ur yettmettat ara, ad d-nawi abrid yewwi i wakken tarwa nneɣ ad tennerni » i tenna Massa Ǧuzi Yasmina s yisem-is d taselmadt n tutlayt d yidles n tmaziɣt di temdint n Tizi Wezzu
Llan akk yimeddukkal-is d yimeddukkal n twacult-is. Argaz, tameṭṭut bedden-d ɣer tama n weltma-s Faḍila i d-yewwin ilmend n temlilit-agi yid-s tiɣawsin i d-yeǧǧa Yasin, ama d idlisen ama d allalen s wayes yettaru di zzman-is, ula d kra seg yiselsa-ines tewwi-ten-id ɣer temzikkent i yellan di tzeqqa n Zmirli Muḥemed sdaxel n uxxam n yidles Mulud Mɛemmri.
Ɣef leḥdac yettunefk wawal i wid i t-yessnen. D weltma-s Faḍila, d Rabaḥ Zamum mmi-s n LeColonel Si Salaḥ d masa Zamum tameṭṭut n ɛli Zamum d massa Zmirli, d yimeddukkal-is n Galma, d unemhal n yidles n Lwilaya n Tizi Wezzu mass Uld ɛLI Lhadi akken ma llan cehden-d ɣef tikli n urgaz-agi d umennuɣ-is, d wayen i d-yeǧǧa, ladɣa udem n yidles d tsekla tazzayri i isḍal akkin i waman. Ma d ass wis sin llan-d tasebḥit n wass isaragen ɣef tira-ines d wazal yefka i umezgun deg ubrid umennuɣ,; mgal aṭas n tɣulaḍ. Ar taggara tekfa temlilit s terbaɛt n Ddebza i d-yuɣalen ɣer ccna s tezlatin tiqdimin d kra n tmaynutin. Tajmilt i as-yuɣalen i Kateb Yasin, tezwi aɣebbar n tatut, teldi allen i yilmeéyen ur nessin kra fell-as. Yasin yemmut, Neǧma tedder.
Ɛebdella ɛarqu