Am wakken I wulfen, Iwaquren mmugren tameɣra,Tɛacurt s yiwet n tmecreḍt s wazal-is. Imi, 56 n yizgaren d 12 n wakraren i zlan ilmend n lɛid-a. kra n wussan neɣ n yimalasen uqbel taɛacurt, tajmaɛit n taddart tessebded yiwet n tseqqamut ara yestkelfen s uheggi n ttawilat iwulmen. Imdanen-a, deg yiwen n wulɣu, gren tiɣri i yimezdaɣ n Raffour iwakken ad ttekkin di tmecreḍt-a. Yal wa s wacu i d-iger. Kra s tedrimt, wiyaḍ s yizgaren d wakraren wiyaḍ-nniḍen s yisufar n wučči. Almi d lawan, yewweḍ leḥsab ɣer umḍan i d-nudder. Ass n lǧemɛa, tasebḥit beggsen-d yiɛerḍiyen, zlan akk iɣersiwen i d-yettwaheggan. Rran-ten di rrif iwakken ad kkusmen i uzekka-nni. Ass n ssebt, ur tettafeḍ ara abrid ad tɛeddiḍ ɣer rreḥba. Arrac, ilmeẓyen, ilemmasen d yimɣaren ɛemren amkan. Kul wa s wacu i d-yelha. Almi yekfa unegzum, bedden-d iqerra n yiderma, yal wa yewwi-d s ttfasil amḍan n yimdanen yettidiren anda yella. Asmi yekfa leḥsab, yettwafreq uksum ɣef yimezdaɣ,; yal yiwen s umur-is. Ɣef wakken i ɣ-d-inna Dda Mohand, yiwen seg yimḍebbren di tejmaɛit:” Ɣur-neɣ,; ulac win ur nettawi ara amur-is. Ula ma yella yiwen d aɣrib, ad d-iruḥ si twacult-is win ara yawin tunt-is. Ɣas yebɛed, nekni ur t-ntettu ara.” Dɣa ayen yerzan lexlas, aɛeggal-a yenna-d:” s win i d-yefkan tadrimt, s win ur d-nefki, ad yečč aksum. Ass-a, yeɛdel win yesɛan d win ur nesɛi, igellil d umerkanti.” Ma d ayen yerzan isafaren n wučči, d lhadj M’hend i yeddan yid-neɣ ɣer yiwet n texxamt i n-ufan teggemgem. Seg uwren alma d zzit ternuḍ lqehwa d ssker, yenna uɛeggal-a n tejmaɛit:” Ayen akk i twalam akka d imdanen i t-id-yefkan.” Deg wawal-is yerna:” Azekka, aya ad yettwafreq i yigellilen almend n wazal n yal tawacult yenḥafen;” S kra n win ara yerzun ɣer taddart-a, ad yeḥsu s ugerruj i d-ǧǧan yimezwura nneɣ,; lukan i t-neṭṭafer akka am Yiwaquren.
M. Smail