Deg yiseggasen iεeddan,amḍiq-a qesdden-t waṭas n yiḥewwasen ama d iberraniyen i d-yettasen γer Bgayet neγ d imezdaγ n temdint akken ad tnefsen deg-s nnesma n lebḥer agrakal,ad walin iseyyaden i yettheyyin lbaburat-nsen akken ad ffγen γer syada. Deg ussan-a iεeddan yewweḍ-aγ-d lexbar dakken iγallen n laman ttagin i yemdanen ad εeddin γer din,d aya i yaγ-yeǧǧan ad nerzu γef demma akken ad nwekked lexbar. Ladγa yiwen seg yiγallen n laman yettεassan dinna yenna-yaγ-d: »Azal n sin n waguren aya i yaγ-d-yettunefk lamer n uqareε n yemdanen akken ur ttεeddayen ara »,aya mebla ma yefka-d ugar n ttfasil. Ad nini kan belli aṭas n yimezdaγ n temdint i d wi d-nemlal sbegnen-aγ-d lγiḍ-nsen γef ugdal-a,ssaramen akken wid i teεna temsalt ad t-ldin s lεejlan.
Mokrane Chikhi