Ddiwan aɣelnaw n wurti n Uheggar (OPNA) ihegga-d yiwet n tfaska taɣelnawt n tẓuri n Uheggar ɣef teɣzi n 6 wussan seg 15 almi d 20 deg waggur n furar yezrin. Ahil n temlilit-a yella-d d amerkanti s temzikniyin d yisaragen anda aṭas n yimusnawen n umezruy gar-asen Ali Sayed i d-yewwin awal ɣef Tin Hinan akked Ighil Aḥriz Farid d Betrouni i d-yemmeslayen ɣef umezruy n umkan-a. Leqdic-a, yeḍra-d deg tlata wussan imezwura n tfaska. Ma deg wussan i d-yeggran, imḍebbren n temlilit-a fernen ad kemmlen leqdic nsen deg umkan ideg temḍel Tin Hinan iwumi qqaren Abalisa. Da, skeflen-d amezruy n yiwet n taddart yettwasnen di lawan-is s lḥirfat n ufus. Tamnaḍt-a dɣa d tin id –yellan d talast gar Tmenɣast d tmura i s-d-yezzin al Mali, Niger d Sseḥra taɣerbit. Nnig n waya, llant-d tmeɣriwin anda yettekki Samba Touré, Moussa Koita, tarbaɛt May n Sidi Belabbès akked kra n trebbaɛ n yitargiyen yecban Chana d Ajla.
Djouher Chili