Seg wasmi i d-yeffeγ wungal »Iḍ d wass » deg useggas n 1990 ar ass-a,mazal imdanen ur t-ṛwin ara.Wid i t-yesεan ttεawaden-as taγuri,ma d wid ur t-neksib ara ttnadin fell-as di temkerḍiyin neγ γer yimdukal-nsen akken ad t-γren. »Iḍ d wass » d yiwen seg wungalen imezwura i d-yeffγen s tmaziγt deg useggas n 1990 γer teẓrigin ASALU/AẒAR,deg-s aṭas n temsal i yezmer ad yaf yimeγri;gar-asent anbeddel i d-yettilin deg tmetti taqbaylit imi yettmeslay-d γef tallit ideg imdanen bdan ttefγen-d seg tudert taqdimt tkeččem-iten-id tudert tatrart.Adlis-a i yuγen amkan yelhan di tnedlist tamaziγt ladγa γer yisdawiyen i yeggan fell-as aṭas n tezrawin,i t-yuran d amyaru ameqran Σmer Mezdad deg useggas n 1983,tlata n yiseggasen kan mbeεd tafsut n yimaziγen. Atan ihi yuγal-d udlis-a deg useggas n 2010,imi amyaru-nneγ γas ma netta lxedma-s d amejjay yettdawin tifekkiwin meεna yettdawi allaγen ifuden tamusni d wulawen yuḍnen s sseba n tuget n lxiq d lehmum n tudert yemcubbaken. Dda Σmer Mezdad, iεawed-as-d asufeγ i udlis-a s ddema-s netta yakan(s ttawilat-is) akken ad yessefreḥ imeγriyen wa ad yesnerni tamkerḍit tamaziγt i yuḥwaǧen aṭas n yidlisen.Deg tezwert n teẓrigt-a tamaynut yura: »Iḍ d wass,tura qrib 30 n yiseggasen aya seg wasmi i t-nura.tilufa-nni i ugaden yimezdaγ n wungal am Malḥa,Muḥend Ameẓyan,Dda Rabeḥ d Si Muḥend Weεli zrint akk fell-aγ!Iseggasen-a ineggura tadlist ulac-itt i tiγin;medden i tt-yettnadin ur ufan amek ara tt-id-sasen.Llan wid i γ-tt-id-yessutren,attan teẓrigt tis snat, akken ad tt-γren ma yehwa-yasen ». Ad nesmekti kan belli mass Σmer Mezdad yessufeγ-d yakan ungal-is wis sin deg useggas n 2000 umi isemma »Tagrest urγu »,deg useggas n 2006 yessefeγ-d ungal-nniḍen umi isemma »Ass-nni ».Aya mebγir ma nettu amud n tullisin « Tuγalin » i d-yeffγen deg useggas n 2003 d wamud n yisefra « Tafunast igujilen » i d-yessufeγ deg useggas n 1977.Am wakken daγen i yura adlis n tjerrumt i tzemrem ad teγrem di lantirnet deg tansa-ya:www.ayamun.com.Mebla ccek Dda Σmer Mezdad mazal ad yernu ad γ-d-yessefreḥ seg mesya γer zdat s kra n udlis amaynut.Ma d ungal « Iḍ d wass »tzemrem(t) ad t-tafem(t) di yakk tinedlisin n tmurt n Leqbayel, yettnuz s 350 idinaren.
Mokrane Chikhi