Idurar ɛlayen n Ǧerǧer gren irebbi deg yimalas yezrin i yiwet n tfaska n ccna i d-yellan di Tikjda ɣef teɣzi n tlata n wussan seg 5 almi d 7 deg waggur n yulyu ideg nella.
Tanmehla n yidles n Tubiret i yellan deffir n uheggi n tmeɣra-agi yettwaxedmen s ddaw leɛnaya n lwali, Mass Ali Bouguerra, ur testehzi ara deg wallalen iwulmen, aya nettwali-t deg tegnatin ideg tɛedda tfaska. Ama si tama n laman anda srabes llan s ṭṭaqa, neɣ d imukan i yimnezhen, asensu n Tikjda ur yessaweḍ ara ad yawi akk imdanen yerzan ɣur-s ak ksen lxiq.
Deg wass amenzu n tfaska i d-yusan d amulli wis-48 n timunent n Lezzayer, d Lhasnaoui Amecṭuḥ i inedhen d amezwaru deg tmeɣra-agi. Seg «la maison blanche » alamma d « Bu tabani », tɛeddiḍ ɣef « init-as ma ad d-yas », anaẓur-agi yessuzen imezdaɣ n Tubiret n ṣṣut n win akken yenfan seg tmurt deg yiseggasen n 30. Akken kan i yekfa, d yiwen seg yifennan mucaɛen deg umalu n tmurt i d-yulin. Wagi, d Chab Anouar. Ifren-d kra akken n tezlatin I yeǧǧan tuget n yilmeẓyen kksen amcum, imi tikkelt-a, imḍebbren n tfaska heggan-d s ddemma asarag I ccḍeḥ.
Deg wass wis-sin, d tarbaɛt Abranis i yerwin taqaɛet. Karim amzun akken d winna n yiseggasen n 80, yewwi yid-s ilmeẓyen di lbabur n Rock Aqbayli. Ɣer tama-s, Bélaid d Yuba, rnan-d aɛeqqa n lmelḥ i tmeɣra. Ɣef teɣzi n yiwet n tsaɛet, taɣect n Abranis terra-d ṣṣut deg yidurar n ǧerǧer. Usan-d yimdanen s ṭṭaqa iwakken ad t-ẓren, ad ḥeḍren i tmeɣra, imi bɣan daɣ ad ttun taluft n tfaska n uheggi i d-yellan deg umkan-agi kra n wagguren yakan. Ass-nni, mi d lawan ad d-yecnu Abranis, yella-d akken kra n yimenɣi i yeǧǧan imḍebbren ḥebsen tafaska deg wass-is aneggaru. D ayen i yessawḍen aṭas n yimdanen usan-d ɣer Abranis, tuget deg-sen s twaculin nsen iwakken ad d-beggnen leḥmala nsen i wudem n ccna n terbaɛt-agi. Uqbel ad d-yali Nasserdine Hourra, yekker yiwen seg wid yettmetilen Lwali n Tubiret akked umḍebber n Daira n Bechloul iwakken ad as-fken yiwen n warraz i ucennay-agi yuklalen leqder. Imir, tkemmel tmeɣra akked ccna s Tcawit.
Deg wass aneggaru n tfaska, nezmer ad d-nini yekker uɣebbar deg waluḍ ! D Mohamed Allaoua i yessaḥman taqaɛet. Ur ufin ara yimdanen anda ara ddun ! argaz tameṭṭut, aqcic taqcict, ula d timɣarin rzant ɣer Tikjda. S tidet, yekkes lxiq i yimdanen, netta icennun tizlatin n lferḥ, n usirem d tayri. Rnu, aẓawan axfifan yessekcamen s asarag mebla ttḥalil.
Nezmer ad d-nini d akken tikkelt-a tafaska-agi tessaweḍ s iswi-is, imi tɛedda deg tegnatin igerzen, d ayen ahat ara yefken afud i yimḍebbren ad d-swejden ɣer zdat timeɣriwin yecban tigi ama di Tubiret neɣ deg umkan-agi yettwasnen s ubeḥri azedgan d waman isemmaḍen.
Udem n yimezdaɣ d win yessefraḥen, imi d tagnit i twaculin fɣent-d ad kksent lxiq, nutenti iwumi ur tettunefk ara tegnit ad ẓrent tifaskiwin.
M. Smail