Nḥemmel awal, nessiɣzif-it am usaru, nettak nnuba i yiles, ihedder mebla tilas. I lukan ad nerr awal di rrif, ad nebges ad tt-naru… tamaziɣt-nni.
At zik ḍebɛen-tt am tecraḍ xas mebla idammen, ssazlen-tt am tɣeṭṭen tiberkanin yeksan deg yiger amellal… taneṣlit ɣef yislaḍen i wid yebɣan ad tt-ddmen.
S ssmex neɣ s lmidad, yewweḍ-d wass nura-tt, nga-as leqrar, nufa-as-d ixef-is xas wa yjebbed wa ykerref… Nessuyes-as-d amur ad aɣren warrac ! Iiiiiiiiiiiiiiiih ! Arrac-nni n tmanyin, wid-nni yerẓan asalu, tafsut teǧǧa-d i yixulaf, tafsut tesɣer ixulaf ɛecrin iseggasen-aya…
Seg yimir, acḥal i nura di tidak yuran, ula akken, ass-a di S.I.L.A., ur d-nḥella amur gar leǧnas xas akken tutlayin am yimdanen kifkif-itent deg uzref ! Ziɣ kullec d awal kan ! Anda-tent tezrigin-nni ara yefken azal i tmaziɣt ? Anda-ten Imaziɣen-nni ara tt-yarun ? Xas ma uran-tt anwa ara s-igen leqrar ? Anef ad neǧǧ amkan i uberrani, ad yeɛmer rreḥba-nni n tektabin, ma d nekkni…
ZIRA