Imezdaγ n tudrin n Tubiret rran lwelha nsen deg wussan-a ineggura γer tfellaht d cγel i ten-yettganin. Ula d ameslay yezga itezzi γef uzemmur, lγella d ttawilat i ilaqen ad ten-id-swejden yimdanen. γas akken kra n lemεasrat ldint tiwwura nsent, lameεna tuget deg-sent d asizdeg n tmacinin i d-yettilin.
Ulamma ttbanen-d tzemrin d tid yewwden i ucraw, maca mazal imdanen ttrajun tallit iwatan iwakken ad tendeh lhemla n ulqad n uzemmur. Araju-agi, γef lehsab n wid i nesteqsa d tallit ur nwulem ara i tzemmurt imi aql-aγ deg yisemmaden n lexrif. Atas i d-yennan d akken mazal ur tekcim ara lγella γer uεeqqa. Tallit-a n sebεa n wussan teţţafar-itt-id daγ tallit nniden anda ur ilaq ara ad necrew deg-s. Tagi d isemmaden n ccetwa ara yekfun ass n 7 deg dujember id –iteddun.
Aseggas-a, ttbanen-d yimdanen am wid yerkeb lhir ad bdun acraw n uzemmur, imi s tidet, isekla ssefrahen, εemren. Leγla n zzit yewwden γer 400 n yidinaren i yiwet n llitra yessawed imdanen ad xedmen tiferkiwin nsen, imi asafar-a ssexdamen-t di tudert n yal ass.
Asirem n watas n yifellahen d akken ad tili lγella almend n wakken urwent tzemrin.
A.A