Gar-aγ d kra n wussan, tamkerḍit n tγiwant n Leεğiba ad teldi tibbura-s i yimeγriyen. D yiwen n yisali yessefraḥen, imi asenfar-a yesεan azal ameqran yusa-d iwakken ad yessifses γef yimezdaγ n tγiwant taεkemt n lixsas n ttawilat n zhu d tmusni. Asiher-a yusa-d deg lawan iwulmen mi akken i d-yella yiwen n lettfaq gar teγlift n usegmi akked tin n yidles. Tigi, jerdent gar-asent γef wayen yerzan leqraya n tektabin sγur yinelmaden. Rray-a yetturajun acḥal aya d tagnit ideg ara yeṭṭef udlis amkan-is, imi yuγal di rrif, almi ula d inelmaden ur as-fkin azal-is. S yiwet, ad d-nini kan taγuri tenqes s watas ula s imeqranen, tis-snat inelmaden ur asen-d-yeggri ara kra n wakud i tγuri, nutni yeεeddayen azal n 8 n tsaεtin deg wass deg uγerbaz.Ihi, lettfaq-a ad yili ahat d win ara d-inejren abrid i usixfif n wahil i yinelmaden am wakken ara yili d win ara iselken tuget deg-sen seg lḥif n tγuri.Degmi imḍebbren n tγiwant n Leεğiba ttheggin s lḥir tulya n temkerḍit-a.
Sylia. M