Ḍsiɣ ɣef wid yettaḍsan
Ɣef wid yerxan imeṭṭi
Ḍsiɣ ɣef wid yestufan
I taḍsa mebɣir iswi
Ḍsiɣ ɣef wid ay as-yennan
Berka-k taḍsa a Rebbi !
(…)
Ḍsiɣ ɣef wid yemmuten
Yettaḍsan ɣef umudir
Ḍsiɣ ɣef win yettewten
Yerwan taḍsa s deffir
Ḍsiɣ ɣef wid ay icemten
Yaqqaren nugar leḥrir
(…)
Ḍsiɣ ɣef tegmat yeḥfan
Seg zik nerra-tt d aseḍsu
Ḍsiɣ ɣef wid yennejlan
Yewwi zzhu yenɣa ukukru
Ḍsiɣ ɣef wid yeddan ɛeryan
Taḍsa-w tuɣal d asefru
(…)
Ḍsiɣ ffɣent-d tmerẓuga
Nwan ḍsiɣ zik-nni
Ḍsiɣ rriɣ-d nnehata
Ɣileɣ taḍsa-w am tayri
Ziɣen aḍḍan-iw d taḍsa
Taḍsa-w tegla-d s yimeṭṭi
(…)
Ḍsiɣ deg tmeɣriwin
Ḍsiɣ deg lajanazat
Ḍsiɣ ɣef wayen ur nemɛin
Ḍsiɣ mi ṛwiɣ rregmat
Ḍsiɣ ula ɣef teqcicin
Yeḍsan s uhuzzu n tuyat
(…)
Ḍsiɣ ɣef wid yeqqaren
Ala akabar-nneɣ ay ilhan
Ḍsiɣ ɣef wid yettnaɣen
Ɣef tekta-nni ay ten-yebḍan
Ḍsiɣ taḍsa-nni ad iyi-nɣen
Ula d nutni fell-i ḍsan
(…)
Ḍsiɣ ɣef wid teṭṭef tḥiṭṭit
Mazal heddren ar tura
Ḍsiɣ ɣef wid yejjan tamaziɣt
Seg zik mazal-tt tennegra
Ḍsiɣ ɣef wid tenɣa timawit
Ar milmi ara bdun tira?
(…)
Ḍsiɣ mi ent-ɣur ddunit
Ttzuxun s wayla n medden
Ḍsiɣ mi asen-tedda tiddit
Tezga tezdeɣ-asen anzaren
Ḍsiɣ ɣef iɛeccaqen n trumit
yettɛeggiḍen d I.M.A.Z.I.Ɣ.E.N
(…)
Ḍsiɣ ɣef tirga n Yidir
iḍ d wass ur ffiɣent
Ḍsiɣ ɣef weskuti n ttdemmir
Ɣef Faffa din yerwa-tent
Am Nekni d Wiyiḍ yettidir
D Asfel ay d-teksa tuccent
(…)
Ḍsiɣ ɣef Mmi-s n yigellil
Ay zedɣen Tawrirt yemetten
Mazal deg lḥif yettektil
Yerwa Iberdan yessawnen
Ḍsiɣ ula ɣef Uhellil
Ur cnan yimeksawen
(…)
S tidet ay ḍsiɣ d ayen kan
Ggumaɣ ad ḥebseɣ taḍsa
Ḍsiɣ ɣef yimɣaren ay d-yennan
Ah yak! a dderya n taḍsa
Ḍsiɣ teḍsam nitni tḍan
nerwa taḍsa ɣef teḍsa
Dɣa glalzeɣ seg teḍsa
Ḍsiɣ… ḍsiɣ… ḍsiɣ…
Nniɣ : ha ! ha! ha!
Sadi Kaci