Yekfa useggas 2010, yeǧǧa nnuba i wayeḍ. D acu i d‑yellan d amaynut deg unnar n yidles deg useggas‑agi yekfan ? d acu i d‑yerna d ajdid di lebni n timadit‑nneɣ? Deg usefti n tutlayt‑nneɣ? Deg usbeddi n nekwa‑nneɣ?
Mebɣir ccek, ayen yeṭṭfen lwelha ugar n wayen nniḍen d “CD” aneggaru “tawriqt tecebḥant” n Lunis Ait Menguellet. Tizlatin yellan deg “CD”- agi neǧǧrent abrid amaynut i tmedyazt n teqbaylit, acku am wakken i ten‑nettraǧu deg lesnin aya, yekcem tikkelt‑a umedyaz ɣer unnar n tidmi talsawit s tehri. Aya yettban deg yisental ɛebban yisefra‑ines, imi llan d wid yeɛnan tilin n umdan deg ddunit d unamek n tilin‑agi. Tuttra tezzi ɣef wamek i d tazwara n tudert d wacu n wudem tewwi taggara ‑ines. Asefru am “imehbal», ma nudder-d kan wagi,ibeggen‑d ljehd n wawal n teqbaylit akked telqay n umyag yesseqdec Lunis, am akken diɣ, i d aɣ‑ yesken amek yezmer ad iɛebbi wawal n teqbaylit timsal yeqnen ɣer tizumna. Ifyar ‑agi weḥd‑sen llan d amedya ɣef telqay n tmedyzat n Lunis akked yiswi wuɣur teṣṣawẹd tmedyazt taqbaylit :
Steqsit di yal lqum
Yal amehbul ad awen‑yini
Win yesɛan taḥbult n uɣrum
D lɛec anda ara yeddari
Ma yal ur yeḥkim di ḥedd
Fell‑as aḥkim ulaḥed
Win yeṣsaweḍ‑itt ɣer lḥedd
Ḥẹsb‑it d aqrib ɣer Rebbi.
Aseggas‑a yekfan diɣ yewwi-d ajdid deg uḥric n umezgun imi segmi d- tuɣal Fuziya At Lḥaǧ d tanemhalt n umezgun n Tizi‑Wezu, mačči d yiwet n tmezgunt i d‑yennulfan s teqbaylit. Gar timezgunin i d‑ilulen nezmer ad d-nebder tamezgunt: “Sinistri” sɣur Kamal Ɛicc akked “Si Pertuf” i d‑yessuli Aḥmed Xudi. Snat n tmezgunin ‑agi yura-tent Muḥya, yufrar-d deg wurar‑nsen umyurar Ait Gueni Saɛid Ḥusin. Am akken diɣ I d- llant snat n tceqqufin “ Biznes is Biznes” akked “ccna n leḍyur” sɣur Fuziya At Elḥaǧ.
Si tama nniḍen, amezgun yemmeɣ ɣer tuddar d tɣiwanin n Tizi Wezzu deg waggur n Remḍan yezrin, imi azal n sebɛa n tceqqufin I d- yezzin i temnaḍin‑agi deg teɣzi n waggur‑nni. D imeyyaten n yimdanen wuɣur yewweḍ umezgun i tikkelt tamezwarut.
Di lǧeṛṛa n leqdic ‑agi, tella‑d ɣer taggara n useggas tulya tunṣibt n uxxam n umezgun kateb Yacine deg Tizi Ouzou. Dima deg wayen yeɛnan aḥric n umezgun, ur ilaq ara ad nettu tafaska n umezgun amaziɣ i d‑ yellan deg tedwilt‑is tis- snat di Batna.
Si lǧiha‑s tamedyazt ur teqqim ara ɣer rrif, imi am yal aseggas, d tifaskiwin I yefkan nnuba I wudem n tsekla I ḥemlen yimdanen deg unnar-agi I nezmer ad d-nebder itri n Uqbu akked d ussan n tmedyazt Yusef Uqasi de Si Muḥend U Mḥend ɣef ayeg llant di lmendad snat n tdukliwin yewwin isem n yimedyazen-agi. Deg tfakiwin-agi, aṭas n yimedyazen ufraren-d wwin- d amaynut I tmedyazt. Gar-asen nezmer ad d-nebder Xatabi Aḥmed, Luni ḥusin, Dali Salima, Nihad Ṣaleh. CCixi Muqran,Tirurda Nacera, Metahri Hakima, Mehadi Rabaḥ.
Am waken diɣ I d-tella tfaska tagraɣlant Si Muḥend U Mḥend I d-tessuddes “imeddukkal n Suzarus” n tiddukkla n Yusef U Qasi, tiddukla n Si Moḥand U Mḥend, d yemdukkel n tmedyazt di Franṣa ɣef yella di lmendad Mass Yvan tetelbom. Di tfaska ‑agi I d- yellan deg Uẓeffun, Tizi Raced akked Tizi Wezzu ttekkan imedyazen imeqranen n tmurt n Franṣa am Claude Ber, Nicole Barriere, Frederique Michaux, Elvire Mourouard ɣer tama n Imedyazen n tmurt n Leqbayel am Aḥmed Laḥlu, Murad Rehman, Swiher Xaled? Nuredin, Hamid, Segini Jugurta d wiyaḍ.
Deg uḥric ‑agi n yisefra, rradyu tis- snat n Leẓẓayer tessuli yiwet n Nnuba tamaynut “ taxalwit imedyazen” ɣef yella di lmendad Mass Nordine akked Zira deg I d- ɛeddan aṭas n yimedyazen I d- yewwin amaynut i tmedyazt taqabylit am Murad Reḥman, Belkada Aḥmed, Anaris Arezqi, d wiyaḍ.
Deg wayen yeɛnan idlisen, aṭas n umaynut i d‑yellan deg useggas‑a yezrin, imi fɣen‑d ɣer tizrigin aṭas n yimuden n tullissin amedya “ger Zik d tura” n Saɛid Cemax, “ameddakkel” sɣur Zimu, “aɣyul n Ǧenǧis” sɣur kezzar. Idlisen ‑agi sbegnen‑d belli tasekla n teqbaylit ur d- telli ara kan d isefra, tella diɣ d tira ɣezzifen am tullissin akked wungalen. Akken idilsen ad awḍen imeɣriyen “Brtv” tella‑d i lmendad n wannect‑a, yiwet n tedwilt d tamaynut ”adlis‑iw ” ɣef yella Mass Ɛabdellah akked Ḥamid. Iswi n tedwilt ‑agi d asbuccaɛ n wayen i d ‑yefɣen d adlis s umata ɣer tizrgin, d usqerdec n tira s tutlayt taqbaylit akken tasekla ad taf imawlan‑is.
Sumata, aseggas-agi yezrin yeččur d amaynut, aya yessebgen-d d akken ma yella lebɣi, xas ulamma yella lixṣas, maca taẓuri tekka‑d nnig‑s.
Ait Slimane Hamid