“Mara yebɣu wegdud telelli
Lmektub ad d-yer tiɣri…”
(Abou el Kacem Chebbi)
Deg waggur n dujember yezrin, ibulisiyen n Sidi Bouzid di Tunes, iwin s zzur sselɛa (tamɛict n twacult) yeznuzuy Mohammed Bouazizi deg yiberdan. Yekker yilemẓi n sdi Bouzid ad yeceki ɣef lbaṭel. Qublen-t-id s uɛekkaz. Ass n 17 deg waggur imekken i yiman-is timest tama n lbiru n gouverneur. Ur iɛeṭṭel ara yewweḍ Mohammed leɛfu n Rebbi. Lbaṭel i d as-yeḍran yesenwawel itunsiyen di yal tama n Tmurt. Dayen, tewweḍ tfidi s iɣes! Akken ma llan, rran tiɣri i Abou el Kacem Chebbi. “Benali dégage !” i ttuɣun deg yiberdan. D yiwen wawal kan, maɛna s wazal-is. Yeddigaji Benali d tmeṭṭut-is leila trabelsi. Tura Tunes n Cartage tettlal-d di tezdeg. Ulac anwa ara iḥebsen tkli-is ɣer tugdut d tlelliyin. Yeẓra wegdud d acu yebɣa. yeẓra surtout d acu i yugi : iččamraren d yiwaṭaniyen am wigi nneɣ. Ad yessiweḍ. D tidet yenḥaf, ixus tadrimt maɛna yesɛ ayen ur nesɛi ara nekni : lakul !
Ayen yeḍran di sidi Bouzid, yeḍra-d di tmurt-nneɣ acḥal di berdan. Dɣa ass n ssebt i ɛeddan i yewweḍ leɛfu rebbi Mohsen Boutertif di sbitar n Ɛennaba. Ula d netta yesserɣ iman-is. Uqbel ad yefk iman-is d asfel, iruḥ yeẓra-d lmir n Boukherdra (d taɣiwant di Tbessa) ad as-yecceki ɣef lmizirya i deg yettidir. Ulac d acu i d as-d-yexdem lmir.
Ass n 14 deg waggur ideg nella, Samir, ilemẓi n 26 n yiseggasen, imekken timest i yiman-is, di tlemmast n temdint n Jijel.
Ass n tmeɣra n yennayer, Aouiachia Mohammed ( d ababat n setta warrac), yesserɣ iman-is akken kan d-yeffeɣ seg la daira anda i i ruḥ ad yecetki.
Attan ihi Sidi Bouzid di Lezzayer ! D acu akka yettraju udabu akken ad yesqaɛed iman-is uqbel ma terwi. U ma terwi, ad tt-yeberwi učamrar i mazal toujours en embuscade. Netta jamais a yeqḍaɛ layas yeẓra d acu ur nesɛa ara : lakul!
Salas.O.A