Ass n 29 d 30 deg waggur iεeddan, tella-d yiwet n temilit γef tudert n Ccix Muḥend U Lḥusin deg uxxam n yidles Lmulud At Mεemmer n temdint n Tizi Wezzu. I lmend n waya, yettwagga-d wahil i sin wassan-a : timsikent n yidlisen, tamedyazt sγur Ahmed LAHLOU, Mourad RAHMANE d Hafid CHENNANE. Ma dayen yeεnan isaragen heggan-ten-id : CHEMAKH Said, yewwi-d awal γef tmedyazt taqdimt n Ccix Muḥend anda i d-yesmekti amezruy n tmedyazt taqbaylit. I wakken ad yefk udem n tussna i umeslay-is, yebda-d si Hérodote, Platon, Ibn Khaldoun akked wayen uran Mouloud Mammeri d Boulifa. GHOBRINI Mohamed yemmeslay-d si sefra γef temlilit i d-ixeyyel gar Ccix Muḥend akked Si Muḥend U Mḥend. Mohand Ouramdane LARAB netta yeḥaka-d tudert n Ccix Muḥend U Lḥusin. Abdenour ABDESLAM yefka-d tamuγli-s γef Ccix Muḥend U Lḥusin AMUSNAW. Asarag aneggaru yewwi-t-id Brahim SALHI γef Ccix di tariqa Rreḥmaniya.
Xas yal wa d acu n uḥric γef wacu i d-yemmeslay meεna akken ma llan beggnen-d d akken Ccix Muḥend d bab n tmussni, d Amussnaw i iferrun timsal. Γef wanect-a dγa i d-yenna Abdennour Abdeslam : iruḥ yiwen wass le juge n Larebεa γer Ccix Muḥend iwakken ad iẓer amek iferru timsalt. Mi yewweḍ yenna-as : sliγ tferruḍ akk timsal n wid i d-yettasen γur-k a Ccix, amek i txeddmeḍ ? Nekni di craε yewεer ad tent-nefru. Yerra-as-d Ccix :’’mi d-usan sin, yiwen yefhem wayeḍ ixus, ad d-nekkes ciṭ n lefhama γer winna i ifehmen ad tt-nefk i winna ur nefhim dγa ad msefhamen. Ma yella usan-d sin fehmen, dinna yeshel ad msefhamen’’. Din din, yenna-as-d le juge :’’ i ma yella usan-d sin ur fhimen ara, acu ara asen-txedmeḍ ? Yerra-as-d Ccix :’’ d wid i nettceyyiε γur-wen’’.
Hocine. M