Deg ussan iεeddan, mi d-yella uneḥbus n lxedma n yixeddamen n paramédical, nεedda γer sbiṭer Nedir Mohammed n temdint n Tizi Wezzu i wakken ad nẓer amek teddun lecγal dinna. Mi newweḍ, nemlal d srabes n SAMU n temdint n Tizi Wezzu. Nesteqsa yiwen gar yimḍebbren-nsen.
Aγmis n yimaziγen : aṭas, ahat, ur nessin d acu-t SAMU ?
Ahcène Larabi : Le SAMU-nneγ yettwaxleq-d deg useggas n 2004, d yiwen n service i yettεawanen imdanen i yellan di yir liḥala berra n sbiṭer, ama deg yixxamen-nsen neγ di twaγiyin i iḍerrun di berra, ladγa les accidents.
Acu lxilaf yellan gar sbiṭer d SAMU ?
Lxilaf amezwaru d wa : sbiṭer ttruḥun-d γur-s imuḍan, le SAMU yettruḥu γer yimuḍan. D acu kan lant tlisa ur nezmir ara ad tent-nεeddi. Nekni neṭṭef kan tamdint n Tizi Wezzu, ur nezmir ara ad nruḥ berra ines alamma yefka-aγ-d ttriḥ lwali d wiyaḍ…ma daxel-is, win ara aγ-d-yessiwlen, din din newweḍ-it.
Anwi yettilin di SAMU, acu diγ n ttawilat i tesεam ?
Ttilin ṭṭebbat d yifremliyen i d-yettwaggan i lmend n waya. Ixeddam-a ferqen γef sin yigrawen axaṭer lxedma-nneγ iḍ d wass. Nesεa daγen snat les ambulances daxel-nsent llan akk ttawilat ilaqen.
Tzemreḍ ad d-tiniḍ acḥal i awen-d-yessawlen deg wagguren-agi ineggura ?
Di 6 wagguren iεeddan, sawlen-aγ-d azal n 1477. Llan wid uγur nruḥ, llan wiyaḍ nefka-asen kan iwillihen. Gar wid uγur nruḥ, 256 nduwa-ten deg umekkan. 192 newwi-ten-id γer sbiṭer n Tizi Wezzu.
Awal-ik aneggaru.
Xxas akka aql-aγ di la grève, meεna llan wid ixeddmen, ama d nekni ama d ixeddamen n sbiṭer. Akken yebγu yili lḥal, nelha-d d imuḍan-nneγ. Ad asen-iniγ i wid yeḥwağen lemεawna deg uḥric-agi n seḥḥa, zemren ad aγ-d-ssiwlen γer wuṭṭun-agi n tililifun : 026 21 29 12/026 21 29 18.
Hocine. M