‘’Awal i unaẓur’’ d yiwet n temlilit i d-yettheggi Slimane Belherat d yinaẓuren yal aggur deg uxxam n yidles Mulud Mεemmri n Tizi Wezzu. « Timlilit tuγal-d, d timlilit tamezwarut aseggas-a n waggur n furar. Tura γur-s 6 yiseggasen seg-mi i ara tt-xeddmeγ. Tdum anecda axaṭer lγaci ṭṭalaben-tt-id, aya yettban-d imi imdanen ttasen-d s waṭas γur-s ». i aγ-d-yenna Slimane Belherat di taggara n temlilit. Ihi, tikelt-a yefka awal i 3 yinaẓuren yal yiwen s uḥric n tẓuri ines. Amezwaru i d-yenced d Mohemed Benhanafi i yettwasnen aṭas di radyu tis snat imi yebda s 1963 am wakken, di&gamma,; d amedyaz ameqqran. Wis sin d Djamel Kaloun, wagi d acennay i d-yufrar taggara-a s yiwen n ṣṣenf n ccna atrar, ha-t-an la d-yettheggay album ines wis tlata. Inebgi aneggaru d yiwen i yuraren deg waṭas n yisura n teqbaylit : macahu, adrar n Baya, Arezqi Lbacir…atg. Wagi d Ousalas. Di taggara n temlilit nnan-d i uγmis n yimaziγen :
Benhanafi : ad cekkreγ lγaci i d-yusan, ččuren-aγ-d amekkan-agi yerna yiwen ur iḥerrek armi tekfa. Tanemmirt imi aṭas n yimdanen i iḥemmelen idles.
Djamel Kaloun : nekk yeεğeb-iyi mliḥ mliḥ lḥal axaṭer nufa-d Benhanafi, ur aγ-tettunefk ara tegnit ad t-id-nettemlili kullas. D iseγ ad iliγ γer tama-s. Dayen yessefraḥen, di taggara mi tfuk temlilit aṭas n yimdanen iyi-d-icekkren, ayagi irennu afud i unaẓur. Tikwal acennay yeqqar-as ahat la tthummuγ kan…
Ousalas : di tazwara, timlilt-agi dayen igerrzen. D timliliyin am tigi i ixuṣṣen dagi di Tizi Wezzu. Akka imdanen ad issinen inaẓuren, inaẓuren ad asen-tettunefk tegnit ad mmeslayen γef wayen xeddmen d wuguren-nsen. Ass-agi, lγaci yusa-d s waṭas, dayen yessefraḥen. Usan-d walan srid Benhanafi imi netta yettwassen meεna yebεed γef tiṭ n medden. A wi yufan ad tili temlilit i netta axaṭer yesεa aṭas n leḥwayeğ ara aγ-d-yini…tanemmirt i Slimane, tanemmirt akk i wid i d-iruḥen…
Hocine. M