Tasdawit n Tubiret tesnubeg-d deg yimalas yezrin yiwen seg yijga n tsekla tamaziɣt. Inebgi-a, d win ur nwulef ara isaragen, ameslay deg yiɣmisen neɣ ahat tiliẓri. Ɛmer MEZDAD, imi d wa iɣef nebɣa ad d-nemmeslay, yerra-d s lferḥ i leɛraḍa n wid iqedcen I tmaziɣt di tesdawit n Tubiret. Yebda awal-is s uḥawac n kra n yinzan anda yeɛreḍ ad ten-icudd ɣer tfelsafit tagrigit. Simmal yessiɣzif deg wawal, simmal tettmiri-d tusna d tmusni, imi tiqenṭyar yexdem gar snat n tsekla, taqbaylit d tegrigit, ahat d izen i kra n widen akk i iḥeḍren iwakken ad ssiwḍen ula d nutni ad d-agmen anda nniḍen, ad jebbun tamuɣli nsen akin i tizi. Dɣa, d ayen I t-yeǧǧan yenna-d:” asisdeg n tutlayt d aɛewwiq ara tt-ikeblen ur tetteddu ara ɣer zdat”. Ɣef leṣab n yimeslayen-is, tutlayt teḥwaǧ ad nessuzzef fell-as aɣebbar, ad d-nawi imeslayen yellan yakan, tikwal, ma ilaq ad d-nawi imesla ijenṭaḍen ur yelli deg-s lɛib ma ur nesṭuqqet ara.
Deg uskasi, imi yal yiwen yebɣa ad d-yessukkes seg umyaru n “tegrest urɣu” cwiṭ akka n tmusni,. Dda Ɛmer, am wakken i as-ssawalen akk wid i t-yesnen, yuɣal-d kra ɣer yiseggasen iɛeddan d leqdic-is deg unnar ɣef tutlayt. Yesmekta-d amecwar-is maca yebra-d akka i yiwet n tidet,mi d-yenna:” tlata n yiseggasen sɛeddaɣ di tsertit kerfen tafekka-w d wallaɣ-iw”. D izen s wazal-is anda i nezmer ad nefhem d akken skud i nettarra tutlayt deg ubuqal n tsertit, tettkaw.
Sylia. M