Deg ussan-agi yineggura, yal ass tettili-d tmesbanit di temdint n Tizi Wezzu : ma mačči d anegzum n yiberdan sγur imezdaγ-is, d tikli n sindikat neγ inelmaden. Ulac ass iεeddan mebla ma yella-d kra. Anegzum n ubrid yettuγal-d acḥal n tikal ladγa di temdint tajdidt deg umekkan iwumi qqaren ‘’la tour’’ neγ γer tama n ssuq ‘’Les corbeaux’’. Wigi ssuturen tifrat i wuguren n temεict-nsen s umata…Ma d sindikat n yiselmaden (UNPEF d SETE/UGTA), nutni ffγen-d s abrid, yal wa d ass i yextar, ṭṭalaben izerfan-nsen, ladγa tamsalt n yidrimen. Ma d wid i tent-yuγen aṭas, wigi d inelmaden n tesdawit Mulud Mεemmri imi nutni ‘’teqqers-asen si yal tama’’. Acḥal n tikal tura i d-ffγen γer yiberdan : yal tikelt s wugur-is ; uguren n leqraya (système LMD) akked wuguren n tεessast daxel n tnezduγin. Ass n lexmis iεeddan, ffγen-d i tikelt-nniḍen imi yiwen uεessas, yella yesker, yewwet sin yinelmaden s lmus lawan n lmakla, yiwen yenṭer ha-t-an di sbiter. ‘’Aεessas i ilaqen ad iḥareb fell-aneγ γef yibarraniyen i d-ikeccmen γer daxel, yuγal d netta i aγ-yekkaten. Maεna yufa abrid, aḥkim ur nesεi aḥkim’’ akka i ssḥasfent snat tnelmadin n Boukhalfa (D.T d N.M)
Hocine. M