Tafsut d tafsut meqqar anef ad yeɣleq webrid… taṣebḥit mazal itran, eṭṭef abrid ɣer Tizi. Maɛna ɣur-k steqsi ma yelli webrid neɣ xaṭi, xaṭer ussan-agi, uqbel ad k-id-terr tewwurt n wexxam ɣer beṛṛa, ad tbellzeḍ lecɣal-ik, ilaq a tetḥeqqeḍ ma yelli webrid neɣ ala, ma ulac ad teṛwuḍ aṣubbu d walluy, yak d tafsut, d titat kan i tettuḍ wamma tafsut n Tizi wezzu ma ur tewwit s imezwura ad tewwet s ineggura ! imezwura atan iban-asen, sya ɣer da ak-inin yeɣleq webrid, ma yeɣleq webrid atan rfan medden, ma rfan ad teṭṭerḍeq d ass-a neɣ d azekka. Yal wa d acu i t-yerḥan, wa ar ass-a, di taddart-is ur iwennaɛ webrid-nnsen, wa ar ass-a ur sɛin tiftilin yemmalen iberdan di ṭṭlam uṭellis ineqqen tamuɣli n wemdan, wa d lxedma ur yufi, wa yeɣra neɣ yeqqim kif kif, temẓi-s tṛuḥ am tadla yečča yilef, wayeḍ ixeddem am yiḍ am wass ur tufiḍ i d-yessuli : d afellaḥ, d ccix n llakul, d afremli, d aɛessas n lḥebs, d aɛṣekri, d ajurnalist, d litidyu, d ṭṭbib, d axeddam n lamiri, d aɛessas n webrid, d apulis, artg&hellip,; wa weɛdent as-fken tamezduɣt asmi s-d-ssawlen ad irez tigrawliwin n yemɣiden….a lukan yiwen wass, di tefsut, ad ɣelqen ak iberdan, wissen amek ara teḍru yid-naɣ ? win yettnadin tawwurt, tlaq-as tikli, tikli deg ubrid, abrid ma yeɣleq, anda ara nelḥu ? asmi ara s-d-naf tawwurt, ass-nni, tafsut ad tewwet s ineggura, ruḥet kan abrid abrid…
Zira