…tafejrit mazal itran
Lukan lliɣ d tapulist, di lɛasima , tafejrit mazal itran, tili yal ssebt ad mmarciɣ ur tufiḍ win ara yi-iqerrɛen ad d-yini kemmi maci n lḥuma-yagi, ṛuḥ anida ara teṛzeḍ. Yal ssebt ad lḥuɣ tikli n tsekkurt, ur yi-ttizmiren yemsebriden ara d-iɛeddin. Lukan d tapulist I lliɣ, ad asen-rreɣ takmamt I yimi ma ṭṭeggiren-d tisuqas s yilesawen-nnsen. Lukan lliɣ d tapulist, di lɛasima, ad ttbekkiṛaɣ yal ssebt ɣef lxemsa n ṣṣbeḥ, yerna ur tufiḍ win ara yi-d-yezzewren ad ayi-d-yini n wansi-kem? Wi kem-ilan? Awi-d nnekwa-m. D acu txeddmeḍ dagi? Anda tettiliḍ? Xas cniɣ-asen-d “… ur nɣiɣ, ur ukireɣ” deg yideflawen. Lukan lliɣ d tapulist ur regguɣ ara lemṛaṛ, I lefjer, ad d-rreɣ qedran seg lɣerba n tmurt-iw. Tili ur s-qqareɣ ara : adrar ay uccen, xas uccanen ad cabiɣ ɣer-sen ; ad ḥireɣ ad tekcem tefsut , ad yeǧǧuǧeg wakal s idammen. Lukan lliɣ d tapulist ad nehraɣ I lemni, abrid I liser, aggaḍ-iw di lweqt, anda bɣuɣ ṛuḥaɣ. Lukan lliɣ d tapulist, ur qebblaɣ rregmat, ur kerrhaɣ iman-iw . Ad d-ffɣaɣ melmi iy-ihwa, ad lḥuɣ akken I y-ihwa, deg yiberdan n lezzayer-inu. Imi d taneɣmast I lliɣ, yif-it kan ad as-iniɣ: zemmem qemmem, adrar ay uccen, ulac amkan di tmurt-a, yif-it wi ṛuḥen, xas ma di llabyu lkaɣeḍ…
Zira