Yasawel yidim i yidim, yefka-d tezweɣ n cbaḥa n i iǧeǧǧigen . teḍbaɛ ɣef tiflawt yettwerqmen s iḥulfan unaẓur deg tuɣ tirget n tudert. Tlulled ger tidmi d ttayeḍ tugna yetteqazemen tebrek n wussan akked tesmeḍ n wulawen i teddun deg iberden n yinnig ɣer timadit n yixef.
Ur as qqaret kkiɣ-d akkin
Tili-w tezga ger awen
D knuwi itt-yenḍen lɣim
Tasawel tayri i tayri, tefka-d ikuftawen. Tirget yerɣan teserkem lhejna n tmena akken awal ad iqazem awal, amer adif n yifayer ara d illalen ad fesren lhu ɣef tacmet n tudert yezzin, am yir aɛmam, ɣef tudrin yemɣbasen deg axmir n uglugel i – wwin iqanan ɣer reḥba n yal-ass.
Usiɣ-d akken ad ɣeḍleɣ tasusmi
Ɣer wid yerran xemsa ɣef yimmi
Imi taɛkemt-nsen d tilelli
Isxayem yellan d itiri , yerra ṭya-s ɣef Kamal Yaḥyawi, akken iniyen n tafat yettrifigen am ifeṭiwjen deg allaɣ yegren di sekra n tẓuri , ad ruccen s tmeqwa n thuski tiflewt yellan am tislit ger ifassen-is. Tayri tettcebiḥ deg udem-is s ticrad id irewlen i yiideknan tesbeɣ tumlilt, ideknan yellan d inigan n tɣerma werǧin nefni.
Acḥal akka ara s teknum
I lweɛd iken-yettddulun
I umendil iwen iqnen tiṭ ?
Imru di ccew yuzzel ɣer talwiḥt. Mɣen ɣef uglim-is imeslayen yellan d aḍḍu i d- ihuben si ixef n leqrun akken ad yezwi timurṣaḍ ɣef allen yesnudem weɛdez amer ad wallint udem n tudert s telqay, amer ad ferẓent iman n lhu s lekmal.
Deg anact-a kamel yekmel.
S tugna yeẓda ufus-iw
Sneɛteɣ aggasen n wul-iw
Widen d yeqqazen izakawen
Yeffer umdan ixef-is deg tiregwa n wayen i d-ijab wallaɣ-is d tikta, deg ayen yerqem ufus-is d tugniwin, amer nnig-as ad tifrir tidet yellan : « amdan ur yelli d-arbib n tudert, ur yelli d tacrurt i tikerkas uir yelli d alqaf u wurar ». Yeḥluli lmenṭaq deg isefra, yemǧazi wawal d tugna akken ad innin s yiwen ufriwes , s yiwen uduqqes : « amdan yella akken ad yidir d ilelli, yella d tiɣwist n Rebbi ».
Seg ucbak n ufan, s lḥir n wid yedruran telluled tiɣri di tugna. Teḥka-d tanfust n wid jegḥen wussan . Tewwid tanfust n waklan yenfan akkin ɣer « la Kalidunie » akked « la Guanne » ddan d isflan n timihbelt i-ixeddem umdan. Awal mmi-s n tugna irru ɣef iden yedren ddew uzeglu n timhujrit n widen yenwan lbaṭel ur ifennu.
Xas akken thudem lemri
Amzruɣ xas yenuɣni
Yesenɛet- iberden yettawin ɣer telelli !
Ulac ayen iferqen amden ɣef wayeḍ . Akken yebɣu magaradent tinumiyin , leɛwayed, ddin, neɣ udem n tmeti, di tilwat d imadan i yellan i meṛṛa . Taqṣit yesmirjiḥen ɣef tiflewt n kamel d ttin yewwin ɣer wul n yemdanen akken bɣun llan , acku talsa yettazalen deg yidamen is d ttin yuggaren tezla n waman deg isafen . D ttin i yewwin nesma-s di trika N Mḥamed Isyaxxem, d ttin i d-iḥujen deg yirebi n Kateb Yassin. D ttin id yemɣin deg tebḥirt n Mulud Mammeri. D ttin i d –yuggmen si tabɣest n Matub Lunes. Deg akka mi ḥakrent wallen , sefruyent-d ṣber i debɛen ɣef leḥzen yessan ɣef deg wecmen-t lemḥani.
Deg anact-a kamel yekemel.
Luleɣ-d deg yirebbi n lisser
Abrid-iw iban yeḍher
D aqqazem n imfugal n ṭlam !
Ait Slimane Hamid