Tamacahut d abrid n laṣel, d abrid ɣer tmeslayt, win I tt-iḥekkun I wegrud am zun yessuṭeḍ-as izir n uyefki n yemma-s. D leqrun-aya seg yiles ɣer tmeẓẓuɣt, yewweḍ-d lawan deg-I ara tesɛu amur di tilibizyu akken ad terfed idles-nneɣ.
Lexmis iɛeddan tella-d yiwet n temlilit ɣef unadi di timawit ama d timucuha ama d tamedyazt. D timlilit I d-ihegga wesqamu unnig n timmuzɣa deg wexxam n yedles Rachid
MIMOUNI, di Bumerdas. Yiwen wass ssuken-d tiṭ ɣef wazal n tmacahut d tmedyazt ɣer medden meṛṛa. Ddeqs imusnwasen, at tseddawiyin, imedyazen, at lḥirfa d inelmaden I yḥedren timlilit-agi. Dɣa tedba s wawal n kra imusnawen: Mas HELOUANE Hacene, si tesdawit n Tizi Wezzu; Mas OSMANE Belkacem si Khenchla, Masa Djouher AMHIS si tesdawit n Lezzayer d Mas NOUH MEFNOUN Ahmed si Gherdaia. Yal wa d ṛṛay-is ɣef tmacahut, amek tent-ttawin at zik? Azal-nnsent ɣer warrac imecṭaḥ, anwa I d abrid iwulmen akken ad tent-nessaweḍ ass-a n wussan I warrac imecṭaḥ?. Tamuɣli temxallaf, seg ujmaɛ d weḥraz n tmucuha d-ǧǧan imezwura ɣer uleqqem-nnsen d wesnulfu n tmcuha ma yewwi-d lḥal, tira-nnsent akken ara tent-fahmen medden, amkan I ylaq ad sent-yettunefk di ṛṛadyu d tilibizyu xaṭer d tawil iwulmen ayendin I usaweḍ n tmucuha I warrac-nneɣ.
Timlilit tkemmel tameddit n wass s tamedyazt n Ben Mohemmed iteqqsen yal win ara s-yeslen, tessefriwis medden, tessakay-iten, tessemlalay-iten d yiman-nnsen am imezdaɣ n yiwet akken n taddart yuɣen tannumi d temɛict I yman-nnsen almi d asmi I d-yerza ɣer-sen yiwen umusnaw d aṛumi, iga ccan I wayen sserwiwicen ifassen-nnsen deg udɣaɣ, ttcebbiḥen akken ad yiɛziz I tmuɣli, yes I d-ssasayen aɣrum-nnsen. Yeffilmi-ten maâna ur llizen ara almi ten-ixelleṣ.Ɛeddan kra n iseggasen, yewwi-yasen-d asaru-nni, walan iman-nnsen, ziɣen maci d akellex, dɣa deg wassen ssawalen-as yal imi ara bɣun ad sbeggnen kra si tɣerma-nnsen d yedles-nnsen. Tamacahut ur tt-id-yewwi ara kan akka Ben Mohemmed, maɛna akken ad d-yesmekti timlilit-ines netta d Yidir asmi t-id-yeqsed ad as-yerr tamacaht n baba inuba d asefru, tizlit yecna Yidir deg yiseggasen n sebɛin netta d Zahra n Summer, imeslayen n Ben Mohemmed, tewwi idles n tmurt n leqbayel akin I tlisa n tmurt n lezzayer imi s kra n win s-yeslan yecna-tt, s kra n win s-yeslan yewwi-tt d acewwiq .Ben Mohemmed I s-yuran ddeqs n tezlatin I Yidir, kra d asnulfu, kra d aleqqem n wayen qqaren medden: Baba inuba, cfiɣ amzun d iḍelli, ɛlay a tazdayt ɛlay d waṭas n tezlatin nniḍen ama dayen tecna Nuwara, Takfarinas, Meɛtub Lwennas, Aɛmar Ṣerṣur d wiyaḍ nniḍen. Taqbaylit n Ben Mohemmed tuzzel acḥal d iseggasen di ṛṛadyu n teqbaylit, di tesgilin, di tmezgunin. Gar isefra I d-yewwi di Bumerdes: Yemma, wissen, cfiɣ amzun d iḍelli, ad ṛuḥaɣ d asefru n wasmi yellez seg wayen yettwali, yellez si tmurt-is, iḥder-d ṛṛwaḥ ɣer tmura n medden. Tameddit akya d ccnawi n Lwennas Sabi d Djamel Kaloun I yezzuznen ineḥdar. Djamel I d-icewwqen I ywiziwen, iserreḥ I taɣect-is terfed tamedyazt at zik: tamɣart, d kem kan d kra n tezlatin n Yidir, am wakken d-yewwi acewwiq n yiwet si tezlatin-ines ara d-iddun deg usidi-ines ajdid ara d-yeffɣen deg unebd-yagi. Lmusiqa d azuzen, imeslayen ttqqudduren d taqbaylit “…yessaram d leḥbab ad yekkes lxiq, Am tiram mi d-teɣliḍ ɣer daxel a ṭṭiq, fell-I la ttɛeddin laɛwam, di lḥebs la aḥbib la arfiq”. Isefra n leḥzen yerna-yasen lxiḍ n ṛṛuḥ. Dɣa akken kan I tfuk temlilit s imeslayen n Mas ASSAD Si El Hachemi, I d-yefkan ttiɛad di tubiret, di rreḥba n wedlis amaziɣ ara d-yilin dinna si 17 ɣer 20 di yebrir deg-I nella.
Zira