Aqcic-nni d-iεeddan s ijeğğigen
Yugi ad ten-yeṭṭef fell-as
Wegmer-nni ibedden γef tlata iḍarren
Yenna-yas
Ttifxir-iyi widak-nni n temγart
Γas ulamma sellawit rkan
Acku iger tamawt
Tezga d iγimi
Γef wemnar n tebburt
Yeẓra d acu tettrağu
Ihi
Yebγa ad iwali
Lebḥer deg wallen-is
Temγart-nni
Seg wakken netta d lmumen
Yebγa a d-yerr tiririt γef westeqsi
Ad aγ-d-yini
D bu učamar-nni yetteddun s ufella n waman
I yesεan lberhan
Γas ulamma deg wul-is yeẓra
D tameṭṭut-nni icucufen εeryan zdaxel n waman
I d tteffaḥ n lğennet
Ladγa
Mi ara tefser akken taqendurt-is di lqaεa
Ad teẓẓel εeryan deg wusu γef llidra
D aṭablu n ssi Pablo
Iḍarren-nni d as-yemmuten i wemjahed-nni di lgirra-nni
Ad as-d-uγalen d imudduren ma iwala-tt
A ddin qessam
Win ara yesεun ul n wezger
Ad t-id-temmagreḍ
La igezzer taγruṭ ikerri
Am iduḍan n ccikula
Ma d bu yiles n wefrux i yella
A d-yessemγi tuγmas n rrecba
Dγa ass-nni amezwaru a ssiεqa
Llidrat-nni tizeggaγin γef umetreḥ
Din din ad as-yerr llufan di tεebbuṭ-is i tmeṭṭut
Ad yuγal wergaz ad icennu
D acu-t wass-a?
Ur iẓer ara yakk ma d ass neγ d iḍ
Yeẓra kan belli myeḥmalen, daya
…..
Ur d as-tḍerru-yara am weqcic-nni irewlen i imawlan-is
Ur d asen-d-yerri ara awal i iṣeggaden igerdan
Yuγal yeṭṭef-it facal
Mi akken la yettxemmim
Ad yeṭṭef abrid-is γer Ledzayer
Yemmekti-d ad yaf dinna yiwen wemγar
Zdat usekwar
yewεer
Ihi yugad-it
Amγar-nni εass iman-ik
Dγa yesla la d as-d-sṭebṭuben
Yerra-yasen awal
Anwa wa?
A ziγ deg yedmaren-is
Mačči si berra
Yemmekta-d weqcic tameεzuzt-is
Tlata tεeqqayin n ẓẓalamiṭ i d as-iceεεel deg iḍ-nni
Deg wasif
Yal yiwet d acu yebγa ad t-iwali yes-s:
Udem-is, allen-is yakkd tqemmuct-is
Yewwet-itt dinna deg wasif γef yiwen yidis
Azekka-nni
Yemmekti-d lqahwa n ṣṣbeḥ
Neγ lqehwa uyefki
N Jacques Prévet
Maca, yella wayen yettu
Imedyaten
1)- I wacu iwumi yerna ayefki?
I ufenğal n lqahwa
2)- Iwumi yerna taḥjurt n ssker?
I lqehwa uyefki
3)- D acu yeḍran uqbel ur d-yenni ara awal?
Yessers afenğal 🙂
4)- D acu yexdem uqbel ad yels abalṭun neγ takebbuṭ-nni n waman?
Yessers-as lemḍella γef uqerru
Yuγal yemmekti-d mačči yakkd tasuqilt tinna
D asmuḥyet kan
Dγa yenna-yas et ben siryan
yerna d winna d-yessebben lqehwa n ṣṣbeḥ
I d as-yennan
Ih d tidet, tikkwal riγ ad fakeγ ussan-iw,
maca, ur ẓriγ ara, anwa iseg ara bduγ
Dγa yemmekti-d axxam-is
yuγal yenna-yas iḥeqqa wagi mačči d axxam-iw
Lḥaṣul
Larivulisyun tettkemmil
Akka i tt-id-yeğğa umezwaru
Anwi imezwura-yagi-nniḍen?
Ur walaγ tren
Anef-aγ tura kečč
Nniγ-ak ihi
Yecreh wul-iw nezzeh
imi k-ssneγ tura ay Ameẓyan
Sliγ yes-k yakan
D acu kan
Yak teẓriḍ ula d kečč
Widak-agi yakk la irefden tibeḥlusin-nsen fell-aγ
Ur ğğin yiwet
Ladğiktif kalifikatif, pusisif
Neγ tin d ak-yehwan
Kksan fell-aγ sser
Ad ak-iniγ tidet
Mebla qessam
Ma ẓriγ taciṭa iγef rsen
Anef-asen ad ssrewten
Anef-asen kan
I iqerra-nsen i d-ddmen igelzyam
Kečč kamim din din εeqleγ-k
Teldiḍ-d kan imi-k s teqbaylit
Ẓriγ d kečč
D Ameẓyan K.
D aqbayli d wawal
U yerna mačči kan imi telliḍ dagi
Ihi ur d ak-d-nniγ ara yakk anwa i d nekk tura
D warisem
Ssawalen-iyi daγen Sεid
Ur t-ḥemmleγ ara yisem-agi
Γas ulamma d wagi i d isem d as-yefka baba-s ula i jeddi
D ibabaten-nneγ nekk yid-s i d aγ-ten-yefkan yisemawen-agi
Wamma tiyemmatin-nneγ
Yemma-s n jeddi d yemma
Uḥeqq jeddi-k d jeddi-yagi iγef la d ak-d-ttmeslayeγ
Ar d ad ilint ferḥen-t almi d ayen kan mi akken d-nlul
Am nekk, am jeddi
Sεant zzher imi mačči d tullas i d-neffeγ imiren
Tili terwi fell-asent
Ula d yemma-k ahat akken i d as-teḍra
D baba-k ahat i d ak-ifernen isem
Neγ azarisem
Akken d as-yeqqar Kamal Uzerrad
D acu kan
Kečč gerrzen-ak yiwen
Ameẓyan
Twalaḍ
Imi d isem aqbaylit i d ak-fernen
Ẓran daγen d acu yellan deg-s
Yefren Ameẓyan
Akken ur k-tekkat ara tiṭ
Atan teffγeḍ-d d ameqqran
Twalaḍ imi s teqbaylit
Twalaḍ!!!
Nekk yefren-iyi isem aεrab
Sεid
yuγ-d aẓar si Saεidun
Lemmer ad teẓreḍ ssaεada-yagi ideg ddreγ akka tura
Ad truḍ fell-i idammen
Ayen yebγun yeḍru yid-i
Ferḥeγ aṭas yes-k ay Ameẓyan
Nudaγ s tcemmaεt di Lalla n Ternet
Anida ara a d-afeγ
Tenced-ik-id kra n tiddukla tadelsant
Neγ kra n tkebbanit
Ma zemreγ a d-iniγ akka
Ilmend n 20 yebrir
A d-tessiwleḍ kra seg wayen d-tessekreḍ
Ulac
Leqbellec ad ceḍḥen
Ad ẓemmṛen
Daya
Azekka ad ttrun γef tmaziRt-nsen
Ula d nekk yehwa-yi kan kkateγ
Imdanen mačči yiwen-nsen akk
Wali kan tura kečč
Yiwet tγiwant
Tezmer ad ak-d-tefk Muḥya
Ad ak-d-ternu Uyeḥya
Sεid At Mεemmer