Akken yebγu fkan-as isem, Ben Laden neγ Geronimo, yemmut yemmut. Xas ulamma isem n Geronimo yesserfa aṭas les indiens-nni n Marikan, imi γur-sen isem-agi d azamul deg yidles d umezruy-nsen (Geronimo 1829-1909). Σlaḥsab nsen, ur ilaq ara γef Marikan ad tefk isem Geronimo i Ben Laden. Meεna ayen yeḍran, yeḍra. Di Marikan, lhan-d d wayen-nniḍen, lhan-d s lferḥ n tmenγiwt n uεdaw-nsen ameqqran, imḍebber n Lqaεida. Γur-sen d ttar i asen-d-yuγal, d lḥeqq i d-ibanen. Meεna si tama-nniḍen, llan wid yettleqqimen ccek di tmenγiwt-is, wid i d-yeqqaren d asnulfu i d-snulfan asaru-agi n tmettant-is. Neεreḍ ad nefhem, ihi, acimi ur uminen ara s wayen i d-yenna Obama γef tmenγiwt n Ben Laden ? Nemmeslay akked kra, nufa amur ameqqran deg-sen d wid-nni i yessuzuren zik ‘’qui tue qui’’ di tmurt n Lezzayer i yettleqqimen ccek i tmenγiwt n Ben Laden. Γur-sen ur yemmut ara, mačči kan d ddiεaya ara sufγen. Xas akken yettban anwi ineqqen zik d wanwi yettmettaten : zik ineqq Ben Laden, ttmettaten yigerdan, imγaren d tlawin. Tura ineqq Obama, yemmut Ben Laden, ihi kulci iban. Imdanen-agi uγen tannumi ttamnen kan ayen i d-yekkan si « Le Canal historique-nni-nsen », ayen-nniḍen ilaq ad t-skiddben. Akken i as-yenna Matoub :’’ayen i d-yekkan seg ukabar-nsen, xas d agejdur ad t-leqqmen…’’
Llan wiyaḍ-nniḍen, di&gamma,; qqaren ur ilaq ara ad t-ḍeggren γer lebḥar, ilaq ad yemḍel εlaḥsab n wayen i d-yenna ddin. Am wakken netta wid akk yenγa iquder-iten, ahat dγa yenna-asen ad cehden uqbel ad yesṭerḍeq lbumbat-nni i ten-yewwin.
Ass-a iban-d amek yettεici Ben Laden, d acu itett d wamek yettili : gar twacult-is akken ma llan, yettidir am ṣṣelṭan di lweqt anda yettceggiε ilmeẓyen γer yirebbi n lhem ad εicen di leγyur am yiγerdayen ; ad sṭerḍqen iman-nsen am tenbulin d temdinin. Akken qqaren : ‘’ddunit d ddunit kan’’. D wid i t-id-yessekren i yezzin fell-as nγan-t, iṣaḥ-d d nṣib i yiselman.
Yerna, di taggara-a, igduden akk faqqen, aεdaw-nsen ameqqran mačči d Marikan neγ d Fransa neγ d wayeḍ akken i asen-qqaren zik. Ass-a, faqqen, aεdawen-nsen d wid-nsen, d leḥkum n tmura-nsen. Aya yettban-d di tegrawliyin-agi tineggura : Tunes, Maṣer, Libya, Suriya d tiyaḍ…Gar wayen suturen yigduden-a ad naf : tugdut, izerfan n umdan, tilelli n umeslay…leεmer ḍelben dawla islamiya neγ ad wwten Marikan. Ṭṭalaben timura-agi ad ten-εiwnen, mačči kan…
‘’Cwi kan terbeḥ JSK, ihi vive tayri vive JSK’’ i aγ-d-yenna Nadir, yiwen unelmad di tesdawit n Tizi Wezzu i d-yefkan tameẓẓuγt mi nella nettmeslay akked kra n yimdanen. Ihi, vive tayri-k a Nadir, nessaram kan mačči n yiwen yiḍ…
Hocine.M