Di dduṛt-nni yezrin u deg ass n sin di mayyu, yella-d uɛiwed n tmuɣli s ɣuṛ usqamu n yineɣlafen deg yisuḍaf (leqwanen) i yesselḥuyen aḥric n cṛeɛ di tmurt-nneɣ. Acku seg akka dasawen ixxamen n cṛeɛ ideblanen (les tribunaux administratifs) ad ldin tiwwura-nsen i tikelt-nniḍen di meṛṛa timnaḍin n Lezzayer, mbeɛd imi i tent-medlen deg useggas n 1966. Amdal-agi d win ur neǧǧa ara imezdaɣ ad cetkin ɣef lwameṛ n tedbelt (administration) ideg yella meḥyaf kra kkan yiseggasen iɛeddan, yiwen ubugaṭu ɣef ussali-agi yenna: «tuɣalin n yexxamen-agi dayen yelhan, s wakka izzayriyen zemren ad suɣen deg udem n tejɛal ixedmen kra n yixeddamen d yimdebṛen n tedbelt s laṛyuy-nsen, imi ad sɛun azref akken ad cetkin ɣer wid teɛna temsalt (ixxamen n cṛeɛ ideblanen) waki si tama, si tama-nniḍen yezmer daɣen assaɣen (les relations) ad gerrzen ger lɣaci d srebes n tedbelt s umata ». D acu kan tuɣalin n yexxamen-agi n cṛeɛ ttṛaǧun-tt wallalen d imeqṛanen ama deg ayen yeɛnan lheṛǧ neɣ imdanen yetxeṣṣen deg aḥric-agi n cṛeɛ, anect-a ahat dayen ara ad tt-iɛeṭlen.
Farid Lahouari