I lmend n wass agraγlan n yigerdan, LAPALAJ n Tizi Wezzu thegga-d yiwen n ukarnaval i warrac imecṭaḥ ladγa inelmaden n yiγebazen imeza. Uqbel ad d-tili tikli di temdint n Tizi Wezu, fkan ttiεad yinelmaden ad mlilen γef zzuğ deg unnar Oukil Ramdane. Mi d-leḥqen akk yiγerbazen, yal anelmad d acu i d-yelsa, fγen-d aγerbaz aγerbaz ad lḥun deg yiberdan n temdint. Kra tekka tikli-nni, ur ḥbisen warrac di ccna. Tikelt s teqbaylit, tayeḍ s taεrabt neγ s tṛumit. Cennun ula s teglizit. D tamsirt i yimeqqranen-nni i ten-id-yettwalin s leḥnana. Ayen cennun warrac-a amur ameqqran d tizlatin-nni n tmaziγt i ḥefḍen deg uγerbaz. Meεna yal tikelt mi ara tfak tezlit ad d-ssegrin imeslayen-a « anwi wigi, d imaziγen ». Ula d tarbaεt taγelnawt n ddabex uḍar yedda-d lḥeqq-is. Tikli tedda d ayen kan : di necraḥa d lferḥ ameqqran, armi d annar n umenzu n yennayer, annar n JSK. Din, inelmaden ufan aṭas n wuraren i asen-d-heggan yemḍebren n LAPALAJ. Leεben, ččan kra n tẓidanin. Di taggara yal wa yennejmaε s axxam-is u yessaram ad d-yuγal aseggas i d-iteddun. Akka akk i aγ-d-nnan.
Hocine. M